މިދިޔަ ބުރާސްފަތި ދުވަހުގެ މެންދުރު 13:30 ކަންހާއިރު ހިނގި މި ހާދިސާ ދިމާވީ މަގުމަތީގައި އޮތް ފެންގަނޑަކަށް ކަރަންޓް އައިސްގެންނެވެ. މި ހާދިސާގައި އަށް އަހަރުގެ ފިރިހެން ކުއްޖަކާއި 12 އަހަރުގެ އަންހެން ކުއްޖަކުވެސް ވަނީ ކަރަންޓްގައި ޖެހިފައެވެ. އެހެންނަމަވެސް މި ދެކުދިންނަށް ފަރުވާ ދިނުމަށްފަހު އެ ކުދިން ވަނީ އެދުވަހު ހޮސްޕިޓަލުން ދޫކޮށްލާފައެވެ.
މި ހާދިސާގައި ފަރުވާދެމުން އަންނަ 18 އަހަރުގެ ކުއްޖާއަކީ ކަރަންޓްގައި ޖެހުނު 8 އަހަރުގެ ކުއްޖާ ސަލާމަތްކުރަން ފެންގަނޑަށް ފޭބި ކުއްޖާކަމަށް އުނގޫފާރުން ވާހަކަ ދެއްކި މީހަކު ބުންޏެވެ. އަދި އެނގިފައިވާ ގޮތުން އެ ކުއްޖާ ގަޔަށް ކަރަންޓް އައީ ކަރަންޓް ލީކްވެފައިހުރި ހޮޅިދަނޑީގައި އަތްލެވިގެންކަމަށްވެސް އެރަށުން ވާހަކަ ދެއްކި މީހަކު ބުންޏެވެ.
18 އަހަރުގެ ކުއްޖާ ގަޔަށް ކަރަންޓް އައިސްފައި ގާތްގަޑަކަށް 3 ވަރަކަށް މިނެޓް ހުރިކަމަށާއި އެ ކުއްޖާ ބިން މައްޗަށް ވެއްޓުނީ ފެނަކަ މުވައްޒަފެއް އައިސް އެ ސަރަހައްދުން ކަރަންޓް ކަނޑާލުމުންކަމަށްވެސް އެރަށުން ވާހަކަ ދެއްކި މީހަކު ބުނެއެވެ. މި ކުއްޖާއަށް އަދިވްސެ ފަރުވާދެމުން އަންނަނީ އަސީޔޫގައި ވެންޓިލޭޓަރުގައި ބާއްވައިގެންނެވެ. އިތުރު ފަރުވާއަށް މާލެ ގެންދަން ގޮތެއް ނިންމފިފައި ނުވަނީ ކުއްޖާ މުޅިން ސްޓޭބަލް ނުވާތީކަމަށް އެރަށުި ހޮސްޕިޓަލުން ބުނެއެވެ.
ކުޑަކުދިން ކުޅޭ ޕާކެއްގެ ބުޑުގައި ހުރި މި ފެންގަޑަށް ކަރަންޓް އައިސްފައިވަނީ އެ ސަރަހައްދު އަލިކުރަން ޖަހާފައި ހުރި ހޮޅިދަނޑިއަށް ކަރަންޓް އައިސްގެންނެވެ.
ފުލުހުން މިހާރު ދަނީ އެ ސަރަހައްދުކޮށް އެ މައްސަލަ ބަލަމުންނެވެ.
