މިއަދު އެ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވަޒިރު އާދަމް ނަސީރު ވަނީ ރައީސް ޑރ.މުހައްމަދު މުއިއްޒުގެ ހާއްސަ އިސްނެންގެވުމުގެ މަތިން ކުރީގެ އުސްގެކޮޅު އިންޓަރެކްޓިވް މިއުޒިއަމްއަކަށް ބަދަލުކުރުން، އަދި މުޅި ރަސްރަނި ބަގީޗާ ރޭގަނޑަށް ހާއްސަ "އިމާސިވް އެކްސްޕީރިއެންސް" އަކަށް ހަދާ ބަދަލުކުރުމުގެ މަސައްކަަތައް އަލިއަޅުއްވާލާފަ އެވެ.
އިންޓަރެކްޓިވް މިއުޒިއަމްއެއް ހެދުމުގެ މަސައްކަަތައް އިޝާރާތްކޮށް ވަޒީރު ވަނީ ރާއްޖެއިން އެކަމާ ބެހޭ ފަންނީ އެހީތެރިކަން ވަަރަށް ދަތި ކަމަށް ފާހަގަކޮށް އެކަމާ ބެހޭ ޕްރޮޕޯސަލްއެއް ހަދަން ބަލާލާއިރުގައިވެސް ދަތިކަން އޮތް ކަމަށް ވިދާޅުވެފައެވެ. އަދި މިއުޒިއަމްގެ މަސައްކަތްވެސް ކުރިއަށްދާނީ ކަމާބެހޭ ބޭރުން ތަޖުރިބާކާރުންގެ އެހީރތެރިކަމާއި އަދި ދިވެހިން ބޭނުންވާގޮތައްކަމަށް ވަޒީރު ވިދާޅުވި އެވެ.
ރާއްޖޭގައި އޮތް ރަސްކަން ނިމުމަށްފަހު، 1968 ވަނަ އަހަރު، ރައީސް އިބްރާހިމް ނާސިރު ގެ ވެރިކަމުގައި ވަނީ އޭރުގެ ގަނޑުވަރު ހުރި ބިމުގައި ގަސް އިންދުމަށްފަހު ޕާކެއްގެ ގޮތުގައި އެތަން ހުޅުވާދެއްވާފަ އެވެ.
ރަސްރަނި ބަގީޗާ މިހާރު ތަރައްގީކޮށްފައިވަނީ ޒަމާނީ ތަނެއްގެގޮތުގަ އެވެ. އަދި ހިތްފަސޭހަކަމާއިއެކު ކުޑަކުދިންނަށް ކުޅެވޭނެ ގިނަ އިންތިޒާމުތައް ހަމަޖައްސާފައިވާއިރު އެތަނުގައި ސްޓޭޖަކާއި ފައްވާރެއްވެސް ހުރެއެވެ.
