މިކަމާ ގުޅޭ ގޮތުން މިއަދު ހެނދުނު ބޭއްވި ރަސްމިއްޔާތުގައި މޯލްޑިވް ގޭހުގެ ފަރާތުން މި އެއްބަސްވުމުގައި ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަބްދުﷲ މުހައްމަދެވެ. އެލައިޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން ލުވައިޒް އެވެ.
މޯލްޑިވް ގޭހަކީ އެންމެ ގިނަ ބަޔަކު ކައްކާ ގޭހުގެ ހިދުމަތް ހޯދަމުން އަންނަ ސަރުކާރުގެ ކުންފުންޏެކެވެ.
މޯލްޑިވް ގޭހުގެ މެނޭޖިން ޑިރެކްޓަރު އަބްދުﷲ މުހައްމަދު ވިދާޅުވީ ރާއްޖޭގައި ލިކުއިޑް ޕެޓްރޯލިއަމް ގޭސް ނުވަތަ ކައްކާ ގޭސް މިވަގުތު ރައްކާކުރެވެނީ 35 ދުވަހަށް ބޭނުންވާ މިންވަރަށް ކަމަށެވެ. އެކަމަކު އެ ކެޕޭސިޓީ އިތުރުކޮށް ފަސް މަސް ދުވަހަށް ބޭނުންވާ ގޭސް ރާއްޖޭގައި ރައްކާކުރެވޭނެ އިންތިޒާމު މިއަހަރުގެ ތެރޭގައި ހަމަޖެއްސުމަށް މަސައްކަތް ކުރަމުންދާ ކަމަށެވެ.
އެ ކުންފުނިން ވިއްކާ މުދަލުގެ ތެރޭގައި ހީލިއަމް ގޭހައި، އޭސީ ގޭސް އަދި ރެސްޓޯރެންޓު / ކެފޭ ފަދަ ތަންތަނަށް ބޭނުންވާ ބޮޑެތި ކައްކާ ގޭސް ސިލިންޑަރުން ފެށިގެން، ކުދި ފަސް ކިލޯގެ ގޭސްފުޅި ވެސް ހިމެނެ އެވެ. މާލެ ސަރަހައްދަށް ދެމުން އަންނަ ހިދުމަތުގެ އިތުރުން، އަތޮޅު ތެރޭގެ ވިޔަފާރިތަކާ ގުޅިގެން ރާއްޖޭގެ ހުރިހާ ހިސާބަކަށް ކައްކާ ގޭސް ފޯރުކޮށްދިނުމުގެ ހިދުމަތް މޯލްޑިވް ގޭހުން ފޯރު ކޮށްދެ އެވެ.
