ސެއިންޓް ރެޖިސް ސިންގަޕޫރުގައި މިިދިޔަ އަންގާރަ ދުވަހު ބޭއްވި ޓުވިމްބިޓް އެވޯޑްސްގެ ސްމޯލް މާކެޓް ޓެލްކޯ އޮފް ދަ އިޔާއަށް އުރީދޫ މޯލްޑިވްސްގެ އިތުރުން ނޮމިނޭޓްވެފައި ވަނީ ދިރާގާއި ބްރޫނާއީގެ ޑީއެސްޓީ އެވެ.
މި އެވޯޑްސްގައި އޭޝިއާ ޕެސިފިކް ސަރަހައްދުގެ ބޮޑެތި ޓެލްކޯ އަދި ޓެކް ކުންފުނިތަކުން ވަނީ ބައިވެރިވެފަ އެވެ. އޭގެ ތެރޭގައި ބާރްތީ އެއާޓެލް، ސިންގްޓެލް، ސްޓާހަބް، ރަކުޓެން މޮބައިލް ޖަޕާން، ރިލަޔަންސް ޖިއޯ، އިންޑޯސެޓް އުރީދޫ ހަޗިސަން އަދި ޗައިނާ މޮބައިލް ފަދަ ކުންފުނިތައް ހިމެނެ އެވެ.
މި އެވޯޑު ހަފުލާގައި ފާހަގަކޮށްލެވޭ ކާމިޔާބީތައް ހޯދި ކުންފުނިތަކުގެ ތެރޭގައި އެސްކޭޓީ، ރިލަޔަންސް ޖިއޯ، ޕީސީސީޑަބްލިއު، ޓެލްސްޓްރާ، އޮޕްޓަސް، ބާރްތީ އެއާޓެލް އަދި އުރީދޫ މޯލްޑިވްސް ހިމެނެ އެވެ. އުރީދޫން ބުނެފައި ވަނީ މި ކުންފުނިތަކަށް ލިބުނު ކާމިޔާބީއަކީ މުވާސަލާތީ ދާއިރާގައި ކުންފުނިތަކުން ކަސްޓަމަރުންނަށް ފޯރުކޮށްދެމުންދާ ހިދުމަތަކީ މި ރީޖަންގައި ތައުރީފު ހައްގު ހިދުމަތެއްކަން ޔަގީންވާ ކާމިޔާބީއެއް ކަމަށެވެ.
ޓެލެކޮމް އިނޮވޭޓަރުންނަށް ދޭ އެންމެ ޝަރަފު ކަމަށްވާ ޓުވިމްބިޓް ޓެލެކޮމް އެވޯޑްސްއިން ވަނީ 23 ކެޓަގަރީއަކުން ފާހަގަކޮށްލެވޭ ކާމިޔާބީތަކުގެ އަގުވަޒަންކޮށް ޓެލްކޯ އޮފް ދަ އިޔާ، ޓެލްކޯ ޓު ޓެކްކޯ އޮފް ދަ އިޔާ ފަދަ ދާއިރާތަކުން ފާހަގަކޮށްލެވޭ ކުންފުނިތަކަށް ޝަރަފުވެރި އެވޯޑުތައް ހަވާލުކޮށްފަ އެވެ. މި އެވޯޑުގެ ސްޓްރެޓީޖިކް ޕާޓްނަރަކީ ޑިޖިޓަލް ތަޖުރިބާތައް ފޯރުކޮށްދިނުމުގައި މަޝްހޫރު ޓެކްނޮލޮޖީ ކުންފުންޏެއް ކަމަށްވާ އެފް5 އެވެ. މި ޕްރޮގްރާމުގެ މީޑިއާ ޕާޓްނަރަކީ ޑީއެންއޭ އެވެ.
