އެޗްޑީސީން ކުރި އިއުލާނެއްގައި ބުނީ ރަށްވެހި ދަނޑުވެރިކަމުގެ މަޝްރޫއިން ބިން ކުއްޔަށް ދޫކުރުމަށް ހަމަޖެހިފައި ވަނީ ޒުވާނުންނަށާއި ހާއްސަ އެހީއަށް ބޭނުންވާ ފަރާތްތަކަށް ހާއްސަ ކުރެވިފައިވާ ކެޓަގަރީން ކަމަށެވެ.
މި މަޝްރޫއިން ބިން ކުއްޔަށް ނެގުމަށް ޝަރުތުހަމަވާ ފަރާތްތަކުން އެޕްލިކޭޝަން ފޯމު ފުރިހަމަކޮށް، ފޯމާ އެކު ހުށަހަޅަން ޖެހޭ ލިޔެކިޔުންތައް އެ ކޯޕަރޭޝަނުގެ އީމެއިލްއަށް [email protected] އަށް އަންނަ މަހުގެ 12 ވަނަ ދުވަހުގެ ރޭ 11:59 ގެ ކުރިން ފޮނުވުމަށް އެޗްޑީސީން ވަނީ އެދިފަ އެވެ.
އެޗްޑީސީން ބުނެފައި ވަނީ މި މަޝްރޫއާ ބެހޭ މައުލޫމާތު އެ ކޯޕަރޭޝަނުގެ ވެބްސައިޓުންނާއި މައި ހުޅުމާލެއިން ލިބޭނެ ކަމަށެވެ. އިތުރު މައުލޫމާތު ހޯދުމަށް ހޮޓްލައިން 3353535 އަށް ގުޅުމަށް އެޗްޑީސީން އެދެ އެވެ.
ރަށްވެހި ދަނޑުވެރިކަމުގެ މަޝްރޫއަކީ މުޖުތަމައުގެ އެކި ފަރުދުންނަށް ހުޅުވާލައިގެން ދަނޑު ބިންތައް ކުއްޔަށްދީ، ދަނޑުވެރިކަން ހުޅުމާލޭގައި އިތުރު ކުރުމަށް ހިންގާ މަޝްރޫއެކެވެ.
މި މަޝްރޫއުގެ މަގުސަދަކީ މަޝްރޫއު މެދުވެރިކޮށް އިޖުތިމާއީ ގުޅުން ވަރުގަދަކޮށް، ކާބޯތަކެތި ފަސޭހަކަމާ އެކު އުފައްދާ، ލިބޭނެ ގޮތް ހުޅުމާލޭގައި މަގުފަހިކޮށްދިނުން ކަމަށް އެޗްޑީސީން ބުނެ އެވެ.
