އެމްއެމްއޭއިން އާންމުކޮށްފައިވާ މަންތްލީ ސްޓެޓިސްޓިކްސް ރިޕޯޓުގައިވާ ގޮތުން ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ޝެޑިއުލްކޮށްގެން ކުރި އިންޓަނޭޝަނަލް ފްލައިޓް މޫވްމެންޓްތަކުގެ އަދަދު މިދިޔަ އަހަރުގެ ފުރަތަމަ ހަތަރު މަސް ދުވަހު ހުރީ 5،841 ގަ އެވެ. މި އަހަރުގެ އެ މުއްދަތުގައި އެ އަދަދު ވަނީ 5،982 އަށް އިތުރުވެފަ އެވެ. މިއީ 2.4 އިންސައްތައިގެ ކުރިއެރުމެކެވެ.
ތަފާސް ހިސާބުތައް ދައްކާ ގޮތުން އެޕްރީލް މަހުގެ ނިޔަލަށް އިންޓަނޭޝަނަލް ފްލައިޓް މޫވްމެންޓްތަކުގެ ތެރެއިން 5،378 ފްލައިޓް މޫވްމެންޓަކީ ޝެޑިއުލް ފްލައިޓްތަކުގެ ދަތުރުތަކެވެ. އެ މުއްދަތުގައި ޗާޓަރު ފްލައިޓްތަކާއި ޕްރައިވެޓް ފްލައިޓް މޫވްމެންޓް ހުރީ 604 ގަ އެވެ.
މިދިޔަ އަހަރުގެ އެޕްރީލް މަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންނަށް ވުރެ މި އަހަރުގެ އެ މުއްދަތުގައި އައި ފަތުރުވެރިންގެ އަދަދު ވަނީ އިތުުރުވެފަ އެވެ. މި އަހަރުގެ ފުރަތަމަ ހަތަރު މަސް ދުވަހު ހަތް ލައްކައަށް ވުރެ ގިނަ ފަތުރުވެރިން އައިސްފައިވާއިރު، ބެޑް ނައިޓްސް ހުރީ 5،449 ގަ އެވެ.
އެމްއެމްއޭގެ ރިޕޯޓުގައިވާ ގޮތުގައި މި އަހަރުގެ ފުރަތަމަ ހަތަރު މަހު އޮކިއުޕެންސީ ރޭޓް ހުރީ 72.7 އިންސައްތައިގަ އެވެ. މިދިޔަ އަހަރު އެ ރޭޓް ހުރީ 69.5 އިންސައްތައިގަ އެވެ. އެ މުއްދަތުގައި މި އަހަރު 175 ރިސޯޓު އޮޕަރޭޓްކޮށްފައިވެ އެވެ.
