ރައީސް ޑރ. މުހައްމަދު މުއިއްޒުގެ ފުރަތަމަ ކެބިނެޓަށް އައްޔަން ކުރެއްވި 22 ވަޒީރުންގެ ތެރެއިން އެމްޑީޕީން ވިޕެއް ނެރުނީ ހަތަރު މިނިސްޓަރަކަށް ރުހުން ނުދިނުމަށެވެ. އޭގެ ތެރެއިން ތިން މިނިސްޓަރަކަށް ރުހުން ނުދޭން މަޖިލީހުން ފާސްކުރި އެވެ.
އެއީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޓާނީ ޖެނަރަލް އަހުމަދު އުޝާމް އަދި ހައުސިން މިނިސްޓަރު ޑރ. އަލީ ހައިދަރެވެ.
ނަމަވެސް ރައީސް ޑރ. މުއިއްޒު ވަނީ މާ ގިނައިރު ތަކެއް ނުވަނީސް އެ ތިން ބޭފުޅުން އަލުން އެ މަގާމުތަކަށް އައްޔަން ކުރައްވައިފަ އެވެ. އަދި ރުހުން ހޯދުމަށް އަލުން ނަންފުޅުތައް އިއްޔެ ވަނީ މަޖިލީހަށް ފޮނުއްވައިފަ އެވެ.
އަދި 20 ވަނަ ރައްޔިތުންގެ މަޖިލީހަށް ހުށަހެޅި އެ މައްސަލަ މިއަދުގެ ޖަލްސާގައި ވަނީ ދިރާސާ ކުރުމަށް ކޮމިޓީއަށް ފޮނުވާލާފަ އެވެ.
އަދި މިއަދުގެ ޖަލްސާގައި މައްސަލައިގެ ބަހުސް ނިމިއްޖެ ނަމަ ވަޒީރުންނަށް ރުހުން ހޯދުމަށް ވޯޓަށް އެހުން އޮންނާނެ ކަމަށް ބެލެވެ އެވެ. ވޯޓް ނަގާނީ މެންދުރު 1:00 ގައެވެ.
