ކޮމިޓީގެ މުގައްރިރުކަމަށް މެންބަރެއްގެ ނަންފުޅު ހުށަހަޅަން ހުޅުވައިލުމުން އޭދަފުށީ ދާއިރާގެ މެންބަރު އަހްމަދު ސަލީމު ހުށަހެޅުއްވީ ގާސިމުގެ ނަންފުޅެވެ. ބާރަށު ދާއިރާގެ މެންބަރު ޝުޖާ އެ ހުށަހެޅުއްވުމަށް ތާއީދުކުރެއްވުމާއެކު ނެގި ވޯޓުގައި ކޮމިޓީގައި ހިމެނިވަޑައިގަންނަވާ 11 މެންބަރުންގެ އިއްތިފާގުން ގާސިމް އެ މަގާމަށް އިންތިހާބުކޮށްފައިވެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ކޮމިޓީތަކަށް އައްޔަން ކުރަން ޕާޓީތަކުން ފޮނުވި ނަންތައް ފާސްކޮށްފަ އެވެ.
މަޖިލީހުގެ މާލިއްޔަތު މިކޮމިޓީގައި ޖުމްލަ 11 މެންބަރުން ތިއްބެވި އިރު އެމްޑީޕީގެ ދެ މެންބަރަކާއި ޖުމްހޫރީ ޕާޓީގެ މެންބަރު ފިޔަވައި ދެން ތިއްބެވީ ޕީއެންސީ މެންބަރުންނެވެ.
މާލިއްޔަތު ކޮމިޓީ
1. ގާސިމް އިބްރާހިމް (މުގައްރިރު)
2. އަހްމަދު ސަލީމް (ނައިބު މުގައްރިރު)
3. އަހްމަދު ނާޒިމް (މަޖިލިސް ނައިބު ރައީސް)
4. މުހައްމަދު މަމްދޫހް (ފުނަދޫ ދާއިރާ)
5. އަހްމަދު އަޒާން (ހިތަދޫ މެދު ދާއިރާ)
6. އަބްދުﷲ ޝަރީފް (ކެލާ ދާއިރާ)
7. ހަމަދު އަބްދުﷲ (ފުވައްމުލަކު އުތުރު ދާއިރާ)
8. އިބްރާހިމް ސުޖާއު (ބާރަށު ދާއިރާ)
9. އަސަދުﷲ ޝިހާބް (ގެމަނަފުށީ ދާއިރާ)
10. އަބްދުﷲ ޝަމްހީދު (ހުޅުމާލެ ދެކުނު ދާއިރާ)
11. އަބްދުލްޣަފޫރު މޫސާ (ހަނިމާދޫ ދާއިރާ)
މަޖިލީހުގައި މިވަގުތު ތިއްބަވަނީ ޕީއެންސީގެ 75 މެންބަރުންނާއި އެމްޑީޕީގެ 12 މެންބަރުންނާއި އެމްޑީއޭގެ ދެ މެންބަރުންގެ އިތުރުން ޖުމްހޫރީ ޕާޓީގެ މެންބަރަކާއި އެމްއެންޕީގެ މެންބަރަކާއި ވަކި ޕާޓީއަކަށް ނިސްބަތްވެވަޑައިނުގަންނަވާ ދެ މެންބަރުންނެވެ. ކޮމިޓީތަކަށް ސްލޮޓުތައް ކަނޑައެޅުމުގައި ބަލާފައިވަނީ މަޖިލީހުގައި ޕާޓީތަކުން މެންބަރުން ތަމްސީލް ކުރައްވާ އަދަދަށެވެ.
