އެފްއޭއެމްގެ އިންތިހާބާ ގުޅިގެން ފީފާއަށް ގިނަ ޝަކުވާތަކެއް ލިބިފައިވާތީ، އެކަމާ ގުޅޭ ގޮތުން ބަލަން ޖެހޭ ކަންކަން ބެލުމަށްޓަކައި، މިދިޔަ އޭޕްރީލް މަހު ބާއްވަން އުޅުނު އެފްއޭއެމްގެ އިންތިހާބު ފީފާއިން ހުއްޓުވިއެވެ. އޭގެ ފަހުން ފީފާގެ ވަފުދެއް މާލެ އައިސް ކަމާގުޅޭ ފަރާތްތަކާއެކު މަޝްވަރާތައް ކުރިއެވެ. މާލެ އައި ފީފާގެ ޓީމުން، އެފްއޭއެމްގެ އިތުރުން ކްލަބުތަކާ ސަރުކާރުގެ ކަމާގުޅުން ހުރި ފަރާތްތަކާ އޮލިމްޕިކް ކޮމިޓީއާ އަދި ސްޕޯޓްސް ކޮމިޝަނަރާވެސް ބައްދަލު ކުރިއެވެ.
މިހާރު ހިނގަމުންދާ ބައްސާމްގެ ދައުރު، އަންނަ ޖުލައި މަހުގެ ދެވަނަ ދުވަހު ހަމަވާނެއެވެ. އެކަމަކު، އެފްއޭއެމުން ބުނީ، އިންތިހާބާ ގުޅޭ އެއްވެސް އިތުރު އަޕްޑޭޓެއް ނެތް ކަމަށެވެ. މުޅިން އާ އިންތިހާބެއް އިއުލާނުކޮށްގެން ކުރިއަށް ގެންދެވޭނެ މުއްދަތެއް ބައްސާމްގެ މި ދައުރުގައި މިހާރު ދެން ނެތެވެ. އެފްއޭއެމްގެ އަސާސީ ގަވާއިދުގައިވާ ގޮތުގެ މަތިން އިންތިހާބަށް އިއުލާނުކުރުމަށް ފަހު، އިންތިހާބު ބާއްވާ ދުވަހާ ދެމެދު 45 ދުވަހުގެ މުއްދަތެއް ދޭން ޖެހޭނެ އެވެ. އެ މުއްދަތެއް މިދައުރުގައި ދެން ނެތެވެ.
ފީފާއިން އިންތިހާބު ހުއްޓުވިއިރު، އޭޕްރީލް މަހު ބާއްވަން މަސައްކަތް ކުރި އިންތިހާބަށް ކުރިމަތިލެއްވީ ބައްސާމްއާއި އަހްމަދު ތާރިގުއެވެ. އެފްއޭއެމްގެ ރައީސްކަމުގެ މަގާމަށް އަނެއްކާވެސް ބައްސާމް ކުރިމަތިލެއްވި އިރު، ބައްސާމް އަދީލް ޖަލީލްއާ ދެކޮޅަށް އުފުލާފައިވާ މަނީ ލޯންޑަރިން އާއި ހިޔާނާތުގެ ދައުވާގެ ޝަރީއަތްވަނީ ފަށާފައެވެ. ބޮޑު ޖަލު ހުކުމެއް އަތުވެދާނެ ދައުވާތަކެއް އެފްއޭއެމްގެ ރައީސް ބައްސާމް އަދީލް ޖަލީލާ ދެކޮޅަށް ދައުލަތުން އުފުލާފައިވަނީ ފުޓްބޯލް އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ޚިޔާނާތްތެރިވެ، އިތުރު ކުށުގެ ޢަމަލުތައް ހިންގާކަމަށް ތުހުމަތުކުރެވޭ މައްސަލައިގައެވެ.
