މީހުން ޓްރެފިކް ކުރުމާ ގުޅޭ ކަންކަން ވިލަރެސް ކުރާ ގައުމީ ކޮމިޓީ އަލުން އެކުލަވާލައި ބޭއްވި ފުރަތަަމަ ބައްދަލުވުމުގައި ހިއުމަން ޓްރެފިކިންގެ ޝިކާރައަކަށް ވެފައިވާ މީހުންނަށް ރައްކާތެރިކަން ދެވޭނެ ގޮތްތަކާއިމެދު މަޝްވަރާކުރެވުނު ކަމަށް ހޯމް މިނިސްޓްރީގެ ސްޓޭޓް މިނިސްޓަރު ލުބްނާ މުހައްމަދު ޒާހިރު ވިދާޅުވެއްޖެ އެވެ.
Advertisement
މީހުން ޓްރެފިކް ކުރުމާ ގުޅޭ ކަންކަން ވިލަރެސް ކުރާ ގައުމީ ކޮމިޓީ އަލުން އެކުލަވާލައި އެ ކޮމިޓީގެ ފުރަތަމަ ބައްދަލުވުން ބާއްވާފައިވަނީ މިމަހުގެ 5 ވަަނަ ދުވަހުގަ އެވެ. ކޮމިޓީގެ ފުރަތަމަ ބައްދަލުވުމުގައި ހިއުމަން ޓްރެފިކިން ޕްރިވެންޝަންއަށް ރާއްޖެއިން ކުރަން ޖެހޭ މަސައްކަތްތަަކަށް އަލިއަޅުވާލެވުުނެވެ. އަދި ރާއްޖޭގެ "ޓްރެފިކިން އިން ޕާސަން" (ޓީއައިޕީ) ރޭންކިން ދަރަޖައާއި، ދަރަޖަ މަތި ކުރުމަށް އިތުރަށް ކުރަން ޖެހޭ މަސައްކަތްތަކަށްވެސް މަޝްވަރާކުރެވުނުވެ.
"ނޭޝަނަލް އެންޓި ހިއުމަން ޓްރެފިކިން ސްޓީއަރިން ކޮމިޓީ" ބިނާވެފައިވަނީ 10 މެންބަރުންގެ މައްޗަށެވެ. އެއީ:
- ކޮމިޓީގެ ރައީސް: ހޯމް މިނިސްޓްރީން ކަނޑައަޅާފައިވާ މިނިސްޓްރީގެ ބޭފުޅެއް
- އެޓޯނީ ޖެނެރަލް އޮފީހުން ގާނޫނީ ވަކީލެއް
- މޯލްޑިވްސް އިމިގްރޭޝަންއިން އިން އިމިގްރޭޝަން އޮފިސަރެއް
- ކަންޓަމްސް ސާވިސްގެ މުވައްޒަފެއް
- މޯލްޑިވްސް ޕޮލިސް ސާވިސްގެ ފުލުހުންގެ އޮފިސަރެއް
- ލޭބާ ރިލޭޝަންސް އޮތޯރިޓީގެ މުވައްޒަފެއް
- އިކޮނޮމިކް މިނިސްޓްރީގެ މުވައްޒަފެއް
- ހޯމް މިނިސްޓްރީގެ އެންޓި ޓީއައިޕީ އޮފިސަރެއް
- ފެމިިލީ ޑިވެލޮޕްމެންޓް މިނިސްޓްރީގެ މުވައްޒަފެއް
- ސްޓިއަރިން ކޮމިޓީއާ ގުޅުންހުރި ޖަމިއްޔާއެއްގެ ތަމްސީލްކުރާ ފަރާތެއް
"މަޝްވަރާކުރެވިފައި ކަންކަމުގެ ތެރޭގަ، ރާއްޖޭގައި ހިއުމަން ޓްރެފިކިންގެ ކުއްތައް މަދުކުރުމަށް ކަމާ ބެހޭ އިދާރާތަކާއި ޖަމިއްޔާތަކާ ގުޅިގެން ކުރާނެ ގިނަ ގިނަ ކަންކަމުގެ މައްޗަށް އެކުލަވާލާފައިވާ ނޭޝަނަލް ސްޓްރެޓެޖިކް އެކްޝަން ޕްލޭން ތަންފީޒުކުރުމުގެ ކުރިން، މި އެކްޝަން ޕްލޭންގައި ހިމަނާފައިވާ މުހިއްމު ގިނަ ކަންކަމަށް އިތުރަށް މަޝްވަރާ ކުރުމަށް މެމްބަރުން ނިންމި" ލުބުނާ ވިދާޅުވި އެވެ.
މީގެ އިތުރުން އެ ބައްދަލުވުމުގައި މަޝްވަރާކުރެވުނު އިތުރުކަންކަމުގެ ތެރޭގައި ހިއުމަން ޓްރެފިކިން ކުރުމަށް ކަމާ ބެހޭ އިދާރާތަކުގެ ފްރޮންޓް ލައިންގައި މަސައްކަތްކުރާ މުވައްޒަފުން ތަމްރީން ކުރުމާއި އަހުލުވެރިކުރުމުގެ ޕްރޮގްރާމްތައް ބޭއްވުމާއި، ޕްރޮސެކިއުޝަން މަރުހަލާ ވަރުގަދަކޮށް ހަރުދަނާ ކުރުމަށް އިތުރަށް މަސައްކަތް ކުރުމާއި، ހިއުމަން ޓްރެފިކިން ގެ ސްޓޭންޑާޑް އޮޕެރޭޓިން ޕްރޮސީޖާސް (އެސްއޯޕީސް) ރެގިއުލޭޝަންސް އަދި ގައިޑްލައިންސްތައް އެކުލަވާލުމާއި، މިހާރު ހެދިފައިހުރި ގަވައިދުތަކާއި އުސޫލުތައް ގެނައުން ހިމެނޭކަމަށް ލުބްނާ ވިދާޅުވި އެވެ.
"އަދި ވިކްޓިމް ޕްރޮޓެކްޝަންގެ ކަންކަމަށް ކުރަން ޖެހޭ މަސައްކަތް ތަކާއި، ކަމާ ބެހޭ އިދާރާތަކާއި ޖަމިއްޔާ ޖަމާއަތްކާއި ގުޅިގެން ކުރަން ޖެހޭ މަސައްކަތްތައް ދެނެ ގަނެ، އެކަން ކަމަށް މަސައްކަތް ކުރުމަށްވެސް މަޝްވަރާކުރެވުނު" ލުބުނާ "ސީއެންއެމް" އަށް ވިދާޅުވި އެވެ.
މޯލްޑިވްސް ޕޮލިސް ސާވިސްއިން ކުރިއަށް އޮތް 4 އަހަަރަށް އެކުލަވާލާފައިވާ ސްޓްރެޓެޖިކް ޕޮލިސިން ރިކުއާމަންޓް ގައި ހިއުމަން ޓްރެފިކްގެ ކުއްތައް ހުއްޓުވުމަށް މަސައްކަތްކުރުމަކީ މުހިއްމު ކަންކަމުގެ ތެރޭގައި ހިމަނާފައިވާކަމެކެވެ.
