ގޯއެއާއިން ދިވެހި ދައުލަތަށް 3.5 މިލިއަން ޑޮލަރު ދައްކަން ހުކުމް ކުރީ، އޭޕްރީލް، 2022 އިން ފެށިގެން މާޗް، 2023 އާ ހަމައަށް އެއާޕޯޓް ސާވިސް ޗާޖާއި ޑިޕާޗާ ޓެކްސް އާއި އެއާޕޯޓް ޑިވެލޮޕްމަންޓް ފީގެ ގޮތުގައި ދައުލަތަށް ދައްކަން ޖެހޭ ފައިސާ ހޯދުމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ގޯއެއާ އާއި ދެކޮޅަށް ދައުވާ ކުރުމުންނެވެ.
މި މައްސަލައިގައި ސިވިލް ކޯޓުން އެ އެއާލައިންގެ މައްޗަށް ހުކުމްކޮށްފައިވަނީ އެ އެއާލައިންގެ ގައިރު ހާޒިރުގަ އެވެ. ސިވިލް ކޯޓުން މިދިޔަ ހަފުތާގައި ހުކުމުގައިވަނީ މީރާއިން ހޯދުމަށް އެދިފައިވާ 3.5 މިލިއަން ޑޮލަރަކީ ގޯއެއާއިން ދިވެހި ދައުލަތަށް ދައްކަންޖެހޭ ފައިސާއެއްކަން ސާބިތުވާތީ އެއް މަސް ތެރޭގައި އެ ފައިސާ ދައްކަން އެ އެއާލައިންގެ މައްޗަށް އަމުރުކުރާ ކަމަށެވެ.
ގޯއެއާއިން ރާއްޖެއަށް ދަތުރުތައް ފެށި ނަމަވެސް މާލީ ދަތިތަކާ ހެދި އެ ކުންފުނިން މިދިޔަ އަހަރުގެ މާޗް މަހުން ރާއްޖެއަށް ދަތުރު ނުކުރެއެވެ. އެ އެއާލައިނުން ދަތުރު ކުރި ދުވަސްވަރު، ނިއު ދިއްލީ އާއި މުމްބާއީގެ އިތުރުން ބެންގަލޫރާ ދެމެދު ސީދާ ދަތުރުތައް ކުރިއެވެ.
އިންޑިއާގެ ވާދިއާ ގްރޫޕުން އޮޕަރޭޓް ކުރާ ގޯއެއާގެ ބައިނަލްއަގްވާމީ ދަތުރުތައް ތައިލެންޑްގެ ޕުކެޓަށް ވެސް ކުރި އެވެ.
