މި މައްސަލައިގައި ހައްޔަރުކޮށްފައިވާ ދެ މެފަރިންނަކީ ފ. ނިލަންދޫ ޕާމްސައިޑް ޒުނައިރާ އިބްރާހިމް އަދި އޭނާގެ ފިރިމީހާ، ފ. ނިލަންދޫ ޝަބްނަމީގެ އަބްދުﷲ އިބްރާހީމް އެވެ. މީގެ ތެރެއިން އަންހެން މީހާއަކި 39 އަހަރުގެ މީހެކެވެ. އަނެއް މީހާއަކީ 40 އަހަރުގެ މީހެކެވެ.
މި ދެމަފިރިންގެ ތެރެއިން ފިރިހެން މީހާ އެންމެ ފުރަތަމަ ބަންދުކުރީ 15 ދުވަހަށެވެ. އަދި، އަންހެން މީހާ އެންމެ ފުރަތަމަ ބަންދު ކުރީ 10 ދުވަހަށެވެ. ފިރިހެން މީހާގެ ބަންދު 15 ދުވަސް ހަމަވެގެން، މިއަދު ކޯޓަށް ހާޒިރުކޮށް އަލުން 15 ދުވަސް ޖަހާފައިވާއިރު، އަންހެން މީހާގެ 10 ދުވަސް ހަމަވެގެން މިދިޔަ ހަފްތާގައި އޭނާވަނީ އިތުރު 15 ދުވަހަށް ބަންދުކޮށްފަ އެވެ. މި މައްސަލައިގައި ހިމެނޭ އިތުރު ފިރހެނަކުވެސް 15 ދުވަހަށްވަނީ ބަންދުކޮށްފަ އެވެ.
މި މައްސަލައިގައި ކޯޓުގައި ފުލުހުން ބުނެފައިވާ ގޮތުގައި އަންހެން މީހާ ހައްޔަރު ކޮށްފައިވަނީ އެ މީހާ ރަހީނު ކޮށްގެން ގެންގުޅުނު ހ. ހޯގުޅާމަންޒިލް ގެއިންނެވެ. ފުރަތަމަ ބަންދު އަމުރުގައިވާ ގޮތުން އޭނާ ހައްޔަރު ކޮށްފައިވަނީ މީހަކު ރަހީނުކޮށްގެން އުޅޭތީ، ފުލުހުން އެ ގެއަށް ދިއުމުން އެ ގޭގެ ފްލޯއަކުން ފޭބި ވަގުތުގަ އެވެ. މައްސަލާގައި ހިމެނޭ ފިރިހެން މީހާ ވެސް ހައްޔަރު ކޮށްފައިވަނީ ރަހީނު ކުރުމުގައި އޭނާ ޝާމިލްވާ ކަމަށް ފުލުހުންނަށް ދެއްކުމުން އެ ގެ ކައިރިން ކަމަށް ބަންދު އަމުރުގައި ބުނެފައިވެ އެވެ.
މި ދެމަފިރިންގެ ތެރެއިން ފިރިހެން މީހާގެ ކުށުގެ ރެކޯޑް މީގެ ކުރިން ހުރި ނަމަވެސް އަންހެން މީހާގެ ރެކޯޑެއް އޮތް ކަމެއް ނޭނގެ އެވެ. މި ދެ މީހުންގެ މައްޗަށް ފުލުހުން ފުރަތަމަ ކުރި ތުހުމަތުތަކުގެ ތެރޭގައި ރަހީނު ކުރުމާއި ބްލެކްމެއިލް ކުރުމާއި ފޭރުން ހިމެނެ އެވެ. ފަހުން އަންހެން މީހާގެ މައްޗަށް އޮރިޔާން ކާޑު އުފެއްދުމުގެ ތުހުމަތެއްވެސް ކުރިއެވެ.
މި ފަހުން މާލެ ސަރަހައްދުގައި ބްލެކްމެއިލް ކުރުމާއި ރަހީނުކުރުން ފަދަ ކުށްތައް އަންނަނީ ގިނަވަމުންނެވެ.
