މައުލޫމާތު ހޯދައި ލިބިގަތުމުގެ ހައްގު ގާނޫނު އަސާސީގެ 29 ވަނަ މާއްދާއިން ކަށަވަރުކޮށް ދީފައިވާއިރު، އެކަމަށް ހާއްސަ ގާނޫނެއް އެކުލަވާލައި އަމަލުކުރަން ފެށީ 2014 ވަނަ އަހަރު އެވެ. އެއަށް ފަހު ވޭތުވެދިޔަ 10 އަހަރު ދުވަހު އެ ގާނޫނަށް ވޭތުވެދިޔަ ދެ ސަރުކާރުން ވެސް ބަދަލެއް ނުގެނެ އެވެ. އެފަދަ ބިލެއް ވެސް މަޖިލީހަށް ނުފޮނުވަ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނު އިސްލާހުކުރަން ނިންމާފައިވާ ކަމަށް ސަރުކާރުން ބުނެފައި މިވަނީ އިންފޮމޭޝަން ކޮމިޝަން (އައިކޮމް)ގެ އަޑުއެހުންތަކަށް ރައީސް އޮފީހުން ހާޒިރު ނުވާ މައްސަލައިގައި އިންފޮމޭޝަން ކޮމިޝަނަރު އަހްމަދު އާހިދު ރަޝީދު ކަންބޮޑުވުން ފާޅުކުރައްވާފައި ވަނިކޮށެވެ.
ރައީސް އޮފީހުގެ އިސް ތަރުޖަމާނު ހީނާ ވަލީދު މިއަދު "ސީއެންއެމް" އަށް ވިދާޅުވީ މައުމޫމާތު ހޯދައި ލިބިގަތުމުގެ ހައްގުގެ ގާނޫނަށް އިސްލާހު ގެނައުމުގައި އެ ގާނޫނު ތަންފީޒުކުރުމުގައި ޑިމޮކްރެޓިކް ވެއްޓަކަށް ފެއްތުމަށް ގެންނަން ޖެހޭ އިސްލާހުތައް ގެންނަން ނިންމާފައިވާ ކަމަށެވެ.
ނަމަވެސް، ސަރުކާރުން އެ ގާނޫނަށް ގެންނަން ނިންމާފައިވާ އިސްލާހުތަކުގެ ތަފުސީލެއް ހީނާ ނުދެއްވަ އެވެ.
މަޖިލީހުގެ ޖުމްލަ 79 މެންބަރުންނާއެކު ސަރުކާރަށް ފުރިހަމަ ތާއީދު އޮތްއިރު، މި އަދަދަކީ ސަރުކާރުން ބޭނުންވާ ގޮތަށް ގާނޫނުތައް ފާސް ކުރެވޭނެ ވަރުގެ ބޮޑު މެޖޯރިޓީއެކެވެ.
