ކަނޑިތީމު ރައްޔިތުން ހަދިޔާކުރި ތަރިކަތައް ބޭނުންކޮށްގެން އެ ރަށުގައި ސަގާފީ އާސާރެއް ހުޅުވީ މިދިޔަ ހުކުރުދުވަހުގެ ހަވީރެވެ.
ކަނޑިތީމު ކައުންސިލް ރައީސް އަހުސަން "ސީއެންއެމް" އަށް ވިދާޅުވީ އެތަން ހުޅުވުމަށްފަހު ދެ ދުވަހެއްގަ އާންމުންނަށް ދައްކާލާފައިވާކަމަށެވެ. އަދި ކުރިއަށް އޮތްތަނުގައި އެ އާސާރު ކައުންސިލްގެ ބޭނުމަށާއި ރައްޔިތުންގެ ފުދުންތެރިކަމަށް އެތަން ބޭނުން ކުރެވިދާނެކަމާ ގުޅޭގޮތުން އަހުސަން ވާހަކަދެއްކެވި އެވެ.
އަހުސަން އިތުރަށް ވިދާޅުވީ އެ އާސާރަށް ހަދިޔާކޮށްފައި ހުރީ ކުރީގަ އެކި އެކި މަސައްކަތްތަކުގަ ގެންގުޅުނު ޓޫލްސް، ބަދިގޭގަ ގެންގުޅެފަ ހުރި ތަކެތި އަދި އާންމުކޮށް ދިވެހީންގެ މަސައްކަތްތެރިކަން ފެންނަ ކަހަލަ ތަކެތި ކަަމަށެވެ.
މީގެ އިތުރުން ކައުންސިލް ރައީސް ވަނީ މައުރަޒު ނުވަތަ އެ އާސާރު ހުޅުވިގެން ދިޔަ ގޮތުގެ މައްޗަށް އަލި އަޅުއްވާލާފަ އެވެ. މީގެ ފަސް ވަަރަކަށް އަހަރު ކުރިން ކަނޑިތީމުގައި އެފަދަ މަސައްކަތުގައި އުޅޭ ޒުވާން ގްރޫޕަކަށް ނިސްބަތްވާ ފަރާތެއް، އޭނާ އެއިރު ވަރަަށް ގިނަ އާސާރީ ތަކެތި އެއްކޮށް ގޭގައި ބަހައްޓަމުން ދިޔަކަމަށް ކައުންސިލް ރައީސް އަހުސަން ވިދާޅުވި އެވެ. އަދި އެ މަސައްކަތުގެ ތެރެއިން އެ ޒުވާނާއަށް ވިސްނުނީ އެކަން ފުޅާކޮށް ކުރިއަށްގެންދިއުމަށް ކަމަށާއި އޭނާއާ އެކީ އިތުރު ޒުވާނުން ބައިވެރިވެގެން އެ މަސައްކަތް މަޑުމަޑުން ފަށާގަތްކަމަށް އަހުސަން ވިދާޅުވި އެވެ. އެގޮތުން ކަނޑިތީމު ކައުންސިލުން އެއިރު އެކަމުގައި ބޭނުންކުރުމަށް ކުރީގެ ބޭސް ފިހާރައެއް ހުސްކޮށްދިން ކަމަށާއި އަދި އެތަން ބޭނުންކުރީ އެތަކެތިި ރައްކާކޮށް ބެހެއްޓުމަށްކަމަށް ކައުންސިލް ރައީސް އަހުސަން ވިދާޅުވި އެވެ. އެތަނަކީ އާންމުންނަށް ބަލާލަން ވަދެވޭވަަރަށްވުރެ ކުޑަ ތަންކޮޅެއްކަމަށް އަހުސަން ވިދާޅުވި އެވެ.
ޒުވާނުންގެ ގްރޫޕްގައި، ކައުންސިލުން ޖަމިއްޔާއެއް މެދުވެރިކޮށް އެތަން ކައުންސިލްއާ ގުޅިގެން ހިންގުމަށް ވިސްނާފައިވާކަަމަށާއި މިހާރު އެތަން ހުރީ ޖަމިއްޔާއެއް މެދުވެރިކޮށް ކައުންސިލާ އެކީގައި އެތަން ކުރިއަށް ގެންދާގޮތައް ކަމަށް ކައުންސިލް ރައީސް ވިދާޅުވި އެވެ. އެގޮތުން ކައުންސިލްގެ ފަރާތުން އެ މީހުން ބޭނުންވާ ހަރަދުތައް ކުރަމުންދާކަމަށް އަހުސަން ވިދާޅުވި އެވެ.
