ދައުލަތުގެ މީޑިއަށް ދެއްވި ހާއްސަ އިންޓަވިއުއަަކަށް މައުލޫމާތުދެއްވަމުން ފައިސަލް ވިދާޅުވީ ރައީސް ޑރ. މުހައްމަދު މުއިއްޒު ރާއްޖޭގައި ޓޫރިޒަމްއަށް ވަކިތަންތަނެއްގައި އެނދު ތަރައްގީކުރާނެކަމަށް ވައުދުވަޑައިގެންފައިވާކަމަށެވެ. އެ މަޝްރޫއު އަކީ ޗެލެންޖިން ކަމެއް ކަމަށްވީނަަމަވެސް މިހާރު ވާނީ އެކަމަށް ފުޅާ ދާއިރާއެއްގައި މަޝްވަރާކުރުމަށްފަހު ގޮތްތަކެއް ހޯދާފައިކަމަށް މިނިސްޓަރު ފައިސަލް ވިދާޅުވި އެވެ.
އެގޮތުން އެ މަސައްކަަތައް މިނިސްޓްރީން މިހާރު ވާނީ ރައީސް މުއިއްޒު އާއިއެކު މުޅިން ފައިނަލް ލިޔެކިޔުމެއް ތައްޔާރުކޮށްފައިކަމަށާއި އަދި އެކަން އިކޮނޮމީ ކައުންސިލަށްވެސް ހުށަހަޅުއްވާނެކަމަށް މިނިސްޓަރު ވިދާޅުވި އެވެ. އަދި އެކަމުގައި ރައީސްގެ މަޝްވަރާވެސް ހޯދުމަށްފަހު "އިކުއިސިޝަން ކޯސްޓް" އައްވެސް އިތުރު ލުއި ގޮތްތަކެއް އަދި ޓެކްސް ލުއިތަކެއްވެސް ދިނުމަށް ނިންމާފައިވާކަަމަށް މިނިސްޓަރު ފާހަގަކުރެއްވި އެވެ.
އެކަންކަން ފުރިހަަމަކުރުމަށް ގާނޫނަށް އިސްލާހު ގެެނެއުމުގެ މަސައްކަތް މިނިސްޓްރީން ކުރާނެކަމަށާއި އިންޑަސްޓްރީގެ އިރުޝާދުވެސް ހޯދާނެކަމަށްވެސް ފައިސަލް ވިދާޅުވި އެވެ.
މިނިސްޓަރު އިތުރަށް ވިދާޅުވީ 4000 އަދި 6000 އާ ދޭތެރޭގެ އަދަދަަކަށް އެނދު ނެތީހެއް އެސަރަހައްދެއްގައި ނުވަތަ އެ އަތޮޅެއްގައި ޓޫރިޒަމް އެދެވޭގޮތައް ޑިވެލޮޕްއެއް ނުކުރެވޭނެ ކަމަށެވެ. އަދި ނިސްޓްރީން މިހާރު ކުރަމުން ގެންދާ މަސައްކަތަކީ ޓޫރިޒަމް ތެރެއިން އަދި ވަން އައިލެންޑް ކޮންސެޕްޓްގައި ރިސޯޓްތައް ކޮބާތޯ ބަލާ ދެނެގަތުންކަމަށެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މި އަހަރުގެ މިހާތަނަށް އެވަރެޖްކޮށް ދުވާލަކު 5،831 ފަތުރުވެރިން ޒިޔާރަތްކުރެ އެވެ. މި އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ނުވަ ލައްކައަށް ވަނީ އަރައިފަ އެވެ.
ފަތުރުވެރިކަމަށް މި ވަގުތު ރާއްޖޭގައި 174 ރިސޯޓާއި 856 ގެސްޓްހައުސް އާއި 149 ސަފާރީ އުޅަނދާއި 15 ހޮޓާ ދަނީ ހިންގަމުންނެވެ.
