Advertisement

ޒިކްރާ މިސްކިތް ހުރި ބިމުގައި ވަގުތީ މިސްކިތެއް ހަދައި ދިނުމުގެ ހުއްދައަށް އިސްލާމިކް މިނިސްޓްރީގައި އެދިފައިވާ ކަމަށް އެސްޖޭ ކޮންސްޓްރަކްޝަނުން ބުނެފި އެވެ.

އެ ކުންފުނިން ބުނީ އަންނަ ރޯދަ މަހު ޒިކްރާ މިސްކިތް ހިމެނޭ ސަރަހައްދުގައި ދިރިއުޅޭ ރައްޔިތުންނަށް ފަސޭހަކޮށްދިނުމުގެ ގޮތުން އެ ކުންފުނީގެ އަމިއްލަ ހަރަދުގައި، އެ ބިމުގައި ވަގުތީ މިސްކިތެއް އެޅުމުގެ ހުއްދައަކަށް އެދިފައިވާ ކަމަށެވެ. އަދި ހުއްދަ ލިބުނުހާ އަވަހަކަށް ވަގުތީ މިސްކިތުގެ މަސައްކަތް ފަށާނެ ކަމަށް ވެސް އެ ކުންފުނިން ބުނެ އެވެ.

އެސްޖޭން ބުނީ ވަގުތީ މިސްކިތުގެ މަސައްކަތް ފަށާތާ، 90 ދުވަސް ތެރޭގައި ނިންމައިލެވޭނެ ކަމަށެވެ. އެ ކުންފުނިން ވަނީ މިދިޔަ ސެޕްޓެމްބަރު މަހުގެ 20 ވަނަ ދުވަހު، މާލޭގެ އަބަދަށް ފެހި މަގުގައި ކެމިކަލް ގުދަނެއްގައި ރޯވެގެން ހިނގި ނުރައްކާތެރި އަލިފާނުގެ ހާދިސާއާ ގުޅިގެން ވީހާވެސް އަވަހަކަށް އެފަދަ ގުދަންތަން ތިލަފުއްޓަށް ބަދަލު ކުރަން ގްރޭޓާ މާލޭން އިއުލާނު ކުރި ބިޑް ކާމިޔާބުކޮށް، 37 ދުވަހުގެ ތެރޭގައި އެ މަސައްކަތް ނިންމާލާ އެ ކުންފުނީގެ މަސައްކަތުގެ ސްޕީޑް ދައްކާލައިފަ އެވެ.

ދާރުލް ޒިކްރާގެ ނަމުގައި 10 ބުރި އަށް އިމާރާތް ކުރަން ނިންމާފައިވާ ޒިކުރާ މިސްކިތުގެ މަސައްކަތް ނުފެށި ދިގުލައިގެން ގޮސްފައި ވަނީ އެ ބިމުގެ ރެޖިސްޓްރީ ނެތުމުން ދިމާވި ދަތިތަކާއި ހުރެ އެވެ. ޕްލޭނިން ގަވާއިދުގެ ދަށުން، ރެޖިސްޓްރީ ނެތް ބިންތަކުގައި މަސައްކަތް ކުރުން މަނާ ކުރެ އެވެ. ފަހުން އިސްލާމިކް މިނިސްޓްރީން އެސްޖޭ އާއެކު އެކުލަވާލި އެއްބަސްވުން އުވާލަން އުޅުނެވެ. އެކަމަކު މިހާރު އެ މައްސަލަ ކޯޓުން ބޭރުގައި ހައްލު ކުރުމަށް އަންނަނީ މަޝްވަރާ ކުރެވެމުންނެވެ.

އިތުރަށް ކިޔައިލުމަށް:ޒިކުރާ މިސްކިތުގެ މަސައްކަތް ނުފެށިގެން އުޅެނީ އިސްލާމިކް މިނިސްޓްރީގެ އިހުމާލުން!

އެސްޖޭ ކޮންސްޓްރަކްޝަނަކީ ޕީއެސްއައިޕީ މަޝްރޫއުތައް ކާމިޔާބު ކަމާ އެކު ނިންމާ، ކަމާބެހޭ މުއައްސަސާތަކުގެ އިތުބާރު ހޯދާފައިވާ ކުންފުންޏެކެވެ. އެގޮތުން ފާއިތުވި އަހަރު ތަކުގައި އެ ކުންފުންޏަށް ހަވާލު ކުރި ސަރުކާރުގެ ބޮޑެތި އެތައް ޕްރޮޖެކްޓްތަކެއް އެއްވެސް މައްސަލައެއް ނެތި ވަނީ ކާމިޔާބުކަމާއި އެކު ނިންމާފައެވެ.