![](https://cnm.mv/media/images/22d03010-eeb3-4260-9646-ae86de00acc2.jpg)
ސަރުކާރުގެ ފަރާތުން ފުނަދޫ ދާއިރާގެ މެންބަރު މުހައްމަދު މަމްދޫހު މަޖިލީހަށް ހުށަހަޅުއްވާފައިވާ ދައުލަތުގެ ދަރަންޏާބެހޭ ބިލްގެ ބަހުސްގައި ގާސިމް އިބްރާހީމް ވަނީ އައިއެމްއެފްގެ ޕްރޮގްރާމަށް ނުދިއުމަށް މިހާރުން މިހާރަށް ފިޔަވަޅުތަކެއް އަޅަންޖެހޭ ކަމަށް ވިދާޅުވެފަ އެވެ.
ގާސިމް ވަނީ ރާއްޖެއިން ކުރިއަށް އޮތް ދެ އަހަރު ދައްކަންޖެހޭ ދަރަނި ބޮޑުކަން ފާހަގަކުރައްވާފަ އެވެ.
ފިޔަވަޅުތައް އަޅަން ލަސް ނުކުރަން ގާސިމް ތަކުރާރުކޮށް ސަރުކާރާށް ގޮވައިލެއްވި އެވެ. އައިއެމްއެފްގެ ޕްރޮގްރާމްގައި ރާއްޖެ ބައިވެރި ކޮށްފި ނަމަ އެންމެ ޒަރޫރީ ހާލަތުގައި ދޭ ސަބްސިޑީ ވެސް ކަނޑާލަން ޖެހޭނެ ކަމަށާއި ސާބިތުކަމާއެކީ ފިޔަވަޅުތައް ލަސްނުކޮށް އަޅައިގެން ނޫނީ ސަލާމަތެއް ނުވެވޭނެ ކަމަށް ގާސިމް ވިދާޅުވި އެވެ.
އޭނާ ވިދާޅުވި ގޮތުގައި، މި ސަރުކާރުން ވެސް އިންތިހާބު ކާމިޔާބު ކުރަން ކޮންމެ ވާހަކައެއް ދައްކާފައި އޮތަސް މިހާރު ގައުމުގެ ހާލަތަށް ވިސްނައިގެން އަޅަން ޖެހޭ ފިޔަވަޅުތައް އަޅަން ޖެހެ އެވެ. މީގެ ކުރިން އެއްވެސް ވެރިއަކު ހުރިހާ ވައުދެއް ފުއްދާފައި ނުވާ ކަމަށާއި މިވަގުތަށް މުހިންމީ ގައުމަށް މުހިންމު ފިޔަވަޅެއް އެޅުން ކަމަށް ގާސިމް ވިދާޅުވި އެވެ.
ކޮންމެ އަހަރަކު ދަރަނި ބަޖެޓު މަޖިލީހުން ފާސްކުރާއިރު، ބޭނުން ކޮންމެ ގޮތަކަށް ބަޖެޓު ފާސްކުރުމުގެ ބާރު މަޖިލީހަށް އޮތްކަން ވެސް ގާސިމް ހަނދާންކޮށްދެއްވި އެވެ.
އިންތިހާބާ ދިމާކޮށް ސަރުކާރު ހިއްސާވާ ކުންފުނިތަކަށް މުވައްޒަފުން އެއްވެސް މިންގަނޑެއް ނެތި ވެއްދި ވެއްދުމަށް އޭނާ ވަރަށް ބޮޑަށް ފާޑުވިދާޅުވި އެވެ. އަދި ކުރު މުއްދަތުގައި ދައްކާ ގޮތަށް ބޮޑެތި އަދަދުތަކުން ލޯނުތައް ނަގާފައިވާތީ އެކަމަށް ވެސް ވަރަށް ބޮޑަށް ފާޑުވިދާޅުވި އެވެ.
އައިއެމްއެފް ޕްރޮގްރާމަކީ ގައުމުތައް ދަރަނިތައް ދައްކަން އުޒުރުވެރިވާ ހާލަތުގައި ޝަރުތުތަކަކާއެކު އައިއެމްއެފް އިން ދޭ މާލީ އެހީއެކެވެ. މި ޝަރުތުތަކުގެ ތެރޭގައި ސަބްސިޑީތައް ކަނޑާލުން ހިމެނެ އެވެ.
ދިވެހި ދައުލަތުގެ ޖުމުލަ ރިޒާވް 21 ޕަސެންޓަށް ދަށަށް ގޮސް، ރިޒާވްގައި ހުރި އަދަދު 492 މިލިއަން ޑޮލަރަށް މިހާރު ވަނީ އަރައިފަ އެވެ.
މަރުކަޒީ ބޭންކް، އެމްއެމްއޭއިން އެންމެ ފަހުން އާންމުކުރި އިކޮނޮމިކް އަޕްޑޭޓުގައިވާ ގޮތުން މިދިޔަ މެއި މަހުގެ ޖުމްލަ ރިޒާވް ހުރީ 622 މިލިއަން ޑޮލަރުގަ އެވެ. މިދިޔަ އަހަރުގެ އެއްވެސް މަހެއްގައި ރިޒާވް މިހާ ބޮޑަށް ދަށަށް ގޮސްފައެއް ނުވެ އެވެ. މިދިޔަ އަހަރު އެންމެ ބޮޑަށް ގްރޮސް ރިޒާވް ދަށްވި، އޮކްޓޫބަރު މަހުގައި ރިޒާވްގައި 552 މިލިއަން ޑޮލަރު ހުއްޓެވެ.
ދައުލަތުގެ ހަރަދުތައް ކުޑަކުރަން ހާއްސަ ފިޔަވަޅުތަކެއް އަޅަން ސަރުކާރުން މިހާރު ވަނީ ނިންމަވައިފަ އެވެ.