ފުވައްމުލައްސިޓީ ކައުންސިލުން ބުނީ، މި ޕޯޓަލް މެދުވެރިކޮށް އެސިޓީއާއި ގުޅުންހުރި މައްސަލަތަކާއި ޝަކުވާތައް ކައުންސިލާ ހިއްސާކުރެވޭނެ ކަމަށެވެ.
"ސީއެންއެމް" އަށް މައުލޫމާތު ދެއްވަމުން ފުވައްމުލައް ސިޓީގެ މޭޔަރ އިސްމާއިލް ރަފީގް ވިދާޅުވީ، މި ޕޯޓަލް އަކީ ރައްޔިތުންނަށް ވީހާވެސް ލުއި ފަސޭހަކޮށް އަދި ހަރުދަނާ ގޮތެއްގައި ރައްޔިތުންގެ ޝަކުވާތައް ހިއްސާކުރެވޭ ގޮތަށް ފަރުމާކޮށްފައިވާ ޕޯޓަލް އެއް ކަމަށެވެ.
މި ޕޯޓަލް ފަރުމާ ކޮށްފައިވަނީ މައިގަނޑު 9 ދާއިރާއަކުން މައްސަލަ ހުށަހެޅޭ ގޮތަށެވެ. އެއީ ކުނި އުކާލުމާއި ގުޅޭ މައްސަލަތަކާއި, ގަސްގަހާގެއްސާއި ގުޅޭ ކަންބޮޑުވުންތަކާއި, މުދަލަށާއި ތަންތަނަށް ގެއްލުން ދިނުމާއި ގުޅޭ މައްސަލަތަކާއި, އެސިޓީގައި އިމާރާތްކޮށްފައިވާ ހައުސިންގ ޔުނިޓްތަކުގައި ދިރިއުޅޭ ރައްޔިތުންނަށް ދިމާވާ އެކި ކަހަލަ ދަތިތަކުގެ މައްސަލަތަކެވެ.
މީގެ އިތުރުން މިސްކިތްތަކާއި, ޕާކުތަކާއި ކުޅިވަރު ބިންތަކާއި, މަގުތަކާއި މަގު ބައްތިތަކާއި ގުޅޭ މައްސަލަތަކާއިި, ނުގަވައިދުން މަގުތަކުގައި ޕާކުކޮށްފައި ހުންނަ އުޅަނދުތަކުގެ މައްސަލަތައް ރިޕޯޓު ކުރުމާއި މަގުމަތީގެ ގަވާއިދުތަކާއި ގުޅޭ މައްސަލަތަކެވެ.
ރަފީގް ވިދާޅުވީ، މި ޕޯޓަލްގެސަބަބުން ކައުންސިލްގައި މަސައްކަތްކުރާ މުވައްޒަފުންނަށް ފަސޭހަވެގެން ދާނެކަމަށާއި، ނިޒާމެއްގެ ދަށުން މައްސަލަތައް ހައްލުކުރަން ފަސޭހަވެގެންދާނެ ކަމަށެވެ. އަދި މިކަމުގެ ސަބަބުން މައްސަލަތަށް ހައްލުވާ މިންވަރު ދެނެގަންނަން ފަސޭހަވެގެންދާނެ ކަމަށެވެ.
