ތަފާތު ހަތަރު ސަރަހައްދެއްގައި އޮލިމްޕިކް ޑޭ ފާހަގަ ކުރީ، މޯލްޑިވްސް އޮލިމްޕިކް ކޮމިޓީ އިން އިސް ނަގައިގެންނެވެ. މީގެ ފުރަތަމަ ހަރަކާތް އޮތީ މިއަދު ހެނދުނު މާލޭގައެވެ.
މާލޭގައި "އޮލިމްޕިކް ޑޭ ރަން" ކުރިއަށް ގެންދިޔައީ، އާޓިފިޝަލް ބީޗުން ފެށިގެން، 1.2 ކިލޯމީޓަރު ދުވުމެކެވެ. މާލޭގެ އިތުރުން ދެން އޮލިމްޕިކް ޑޭގެ ހަރަކާތްތައް ކުރިއަށް ގެންދިޔައީ ތ. ގުރައިދޫ، ހދ. ކުޅުދުއްފުށި އަދި ޅ. ނައިފަރުގައި މިއަދު ހަވީރު އެވެ.
މާލޭގައި އޮތް އިވެންޓުގައި ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) އާއި މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރު (ޗަމްޕީ) އަދި އެކިއެކި ކުޅިވަރު އެސޯސިއޭޝަންތަކުގެ އިސްވެރިންނާއި އެތުލީޓުން ވަނީ ބައިވެރިވެވަޑައިގެންފަ އެވެ.
މި އިވެންޓުގައި އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ ރައީސް ތޯމަސް ބަކްގެ މެސެޖެއް އޮލިމްޕިކް ކޮމިޓީގެ ރައީސް ހިއްސާކޮށްދެއްވިއެވެ. އަދި ސްޕޯޓްސް މިނިސްޓަރު، ރާފިއުވަނީ "އޮލިމްޕިޒަމް"ގެ މުހިންމުކަން އެތްލީޓުންނަށް ކިޔައިދެއްވާފައެވެ.
