ބަންޑާރަ ނައިބު މިހެން ވިދާޅުވީ އައިސީސީޕީއާރުގެ ރިވިއު ފެށުމުގެ ގޮތުން ވާހަކަފުޅު ދައްކަވަމުންނެވެ.
ބަންޑާރަ ނައިބުގެ އޮފީހުން ނެރުނު ބަޔާނެއްގައިވާ ގޮތުން، ރާއްޖެއިން ދެވަނަ ފަހަރަށް ހުށަހެޅި އެ ރިޕޯޓަކީ ޖުލައި 2012އިން މާޗު 2022ގެ ނިޔަލަށް ކޮށްފައިވާ މަސައްކަތްތަކާގުޅޭ މައުލޫމާތު ހިމަނައިފައިވާ ރިޕޯޓެކެވެ.
އެ ރިވިއު ފެށުމުގެ ގޮތުން އުޝާމް ދެއްކެވި ވާހަކަފުޅުގައި، އިސްލާމްދީނަކީ ދިވެހި ރައްޔިތުކަމުގެ މައިގަނޑު އެއް އަސާސްކަމަށާއި، އެއީ ދިވެހި މުޖުތަމައުގައި ބަދަލުކުރުމަށް ޖާގަ ނުދެވޭނެ އަސްލެއްކަމަށް ވިދާޅުވި އެވެ.
އައިސީސީޕީއާރުގައި ބަޔާންކުރާ ހައްގުތައް ރާއްޖޭގައި ލިބިދެވޭނީ، ރާއްޖޭގެ ޖުމްހޫރިއްޔާގެ ގާނޫނު އަސާސީއާއި، ގާނޫނުތަކާއި އިސްލާމް ދީނުގެ އަސްލުތަކާ އެއްގޮތްވާ ގޮތުގެ މަތިން ކަމަށް އުޝާމް ވިދާޅުވި އެވެ.
ސްވިޒަލޭންޑްގެ ޖެނީވާގައި ދެ ސެޝަނަކަށް ބަހާލައިގެން ކުރިއަށްދިޔަ މި ރިވިއުގައި، ރައީސް އޮފީހާއި، އެޓަނީ ޖެނެރަލްގެ އޮފީހާއި، ފޮރިން މިނިސްޓްރީއާއި ހޯމް މިނިސްޓްރީއާއި ޖެންޑާ މިނިސްޓްރީއާއި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، ޖެނީވާގައި ހުންނަ އ.ދ. ގެ އޮފީހަށް ދިވެހިރާއްޖެއިން ކަނޑައަޅައިފައި ހުންނަ ދާއިމީ މިޝަން ހިމެނޭގޮތުން، ދިވެހި ސަރުކާރުގެ ހައި-ލެވެލް ޑެލެގޭޝަނެއް ބައިވެރިވެވަޑައިގެންފައިވެ އެވެ.
ބަންޑާރަ ނައިބުގެ އޮފީހުން ބުނީ މި ރިވިއު ސެޝަންއަށް ފަހު ދިވެހި ސަރުކާރުގެ ރިޕޯޓާއި ރިވިއު ސެޝަން ގައި އދގެ ހިއުމަން ރައިޓްސް ކޮމެޓީއާ ހިއްސާކުރި މައުލޫމާތުތަކުގެ މައްޗަށް ބިނާކޮށް ކޮމެޓީގެ ކޮންކްލޫޑިން އޮބްސަވޭޝަންތަކާ ރިކޮމެންޑޭޝަންތައް 19 ޖުލައި 2024 ގައި ދިވެހި ސަރުކާރާ ހިއްސާ ކުރާނެ ކަމަށެވެ.
ރާއްޖެއިން މިފަހުން ޔޫރަޕިއަން ޔޫނިއަން (އީޔޫ)ގެ އެއްބަސްވުމެއްގައި ބައިވެރިވާން ނިންމުމާ ގުޅިގެން، އެ އެއްބަސްވުމުން ކަށަވަރުކޮށްދޭ ހައްގުތަކުގެ ތެރޭގައި ދީނާ ހިލާފު ކަންތައްތަކެއް ހިމެނޭ ކަމަށް ބުނެ ބައެއް މީހުން ކަންބޮޑުވުން ފާޅުކުރި އެވެ.
ދިވެހި ސަރުކާރުން ވަނީ، އެ އެއްބަސްވުމުގައި ސޮއިކޮށްފައިވަނީ ރާއްޖޭގެ ގާނޫނުއަސާސީއާ ފުށުއަރާ މާއްދާތަކަށް "ޑެކްލަރޭޝަން" އަދި "ރެޒަވޭޝަން" ހުށަހަޅާފައި ކަމަށް ބުނެފަ އެވެ.
