ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ އާ ބޮޑު ވަޒީރުކަމަށް ޝަރްމާ ހޮވި ވަޑައިގަތުމުން މަރުހަބާ ދަންނަވާކަމަށެވެ. އަދި ރާއްޖެއާއި ނޭޕާލްއިން ގާތް، އެކުވެރި ކަމުގެ ގުޅުން ދަމަހައްޓަމުން އަބަދުވެސް ދާކަމަށް ރައީސް ފާހަގަކުރެއްވިއެވެ.
އެ ޕޯސްޓްގައި ރައީސް އިތުރަށް ވިދާޅުވީ ދެގައުމުގެ ދެމެދުގައި، ދެގައުމުގެ އެއްބާރުލުން އިތުރުކުރުކުރުމުގެ ގޮތުން ނޭޕާލް ސަރުކާރާއެކު މަސައްކަތް ކުރުމަށް އެމަނިކުފާނު އުއްމީދު ކުރައްވާކަމަށެވެ.
ނޭޕާލްގެ އެންމެ ބޮޑު ކޮމިއުނިސްޓް ޕާޓީގެ ލީޑަރު، ޕްރަސާދް ޝަރްމާ އޮލީ ނޭޕާލްގެ ބޮޑުވަޒިރުކަަމަށް އިންތިހާބުވެ ވަޑައިގަތީ މިއަދުގެ ވަގުތެއްގަ އެވެ.
18 މަސްވަންދެން ނޭޕާލްގައި ވެރިކަން ކުރި، ކުރީގެ ބޮޑުވަޒީރު، ޕުޝްޕާ ކަމާލް ދަހަލް އިންތިހާބުން ބަލިކޮށް އޮލީ ބޮޑު ވަޒިރުކަަމުގެ މަގާމު ކާމިޔާބު ކުރެއްވީ އޭނާގެ ކޮމިއުނިސްޓް ޕާޓީ އާއި ސެންޓާ ލެފްޓް ނޭޕާލީ ކޮންގްރެސް ޕާޓީ އެކުވެގެން ހުކުރު ދުވަހު ހެދި ކޯލިޝަންއަކުންނެވެ.
ރާއްޖެއާއި ނޭޕާލްއާ ދެމެދު ޑިޕލޮމެޓިކް ގުޅުން ފުރަތަމަ ގާއިމްކުރީ 1980 ވަނަ އަހަރުގެ އޮގަސްޓް 1 ވަނަ ދުވަހުގަ އެވެ.
