ޔޫރޯ ތެރޭގައި އާއްމުވެފައިވާ މޮންފޯޓް ނެގި މި ފޮޓޯތަކަކީ 2007 ވަނަ އަހަރު މޮންފޯޓް ނެގި ފޮޓޯތަކެކެވެ. އެއީ، ޔުނިސެފް އާއި ބާސެލޯނާ ގުޅިގެން ކުރިއަށް ގެންދިޔަ ކެމްޕެއިނެއްގެ ފޮޓޯތަކެކެވެ.
އޭރުގެ އުމުރުން އެންމެ 20 އަހަރުގެ ލިއޮނަލް މެސީ ތުއްތު ކުއްޖަކާއެކު ނަގާފައިވާ ފޮޓޯތަކުގައި އެވާ ތުއްތު ކުއްޖަކީ މިއަދު ސްޕެއިން ޓީމުގެ އެންމެ މުހިއްމު ކުޅުންތެރިޔާ ކަމަށްވާ ލަމީން ޔަމާލްއެވެ.
ޔޫރޯ ތެރޭގައި އާއްމުވެ، މުޅި ދުނިޔޭގެ ސަމާލުކަން ހުއްޓިފައިވާ މި ފޮޓޯތަކުން މެސީއާއެކު ފެންނަ އަންހެނަކީ ޔަމާލްގެ މަންމައެވެ.
ދެ ލެޖެންޑުންގެ ފެށުމުގެ ގޮތުގައި ސިފަކުރެވޭ މި ފޮޓޯތައް ދުނިޔޭގެ ސަމާލުކަމަށް އައީ، ޔަމާލްގެ ބައްޕަ، އޭނާގެ އިންސްޓަގްރާމް އެކައުންޓުގައި އެ ފޮޓޯތައް ޔޫރޯ ތެރޭގައި އާއްމު ކުރި ހިސާބުންނެވެ.
މޮންފޯޓް ބުނާ ގޮތުގައި އެ ފޮޓޯތައް ނެގުނު މީހަކީ އޭނާ ކަމަށްވުމުން އެކަމާމެދު އޭނާ ފަހުރުވެރިވެއެވެ. އޭނާ ދެކޭ ގޮތުގައި އެއީ، ބިލިއަނަކުން އެއް ފަހަރު ލިބޭ ކަހަލަ ފުރުސަތެކެވެ.
