އެޗްޑީސީން މިއަދު ނެރުނު އިއުލާނެެއްގައި ބުނެފައިވަނީ ހުޅުމާލޭގެ އެކިއެކި ސަރަހައްދުތަކުގެ ދުވާރު މަތީގައި އަދި ހެޖުތެރޭގައި ކެފޭ، ރެސްޓޯރެންޓް އަދި ޓޭކްއަވޭތަކުން ގޮނޑި މޭޒު ބަހައްޓައިގެން ހިދުމަތް ދެމުންގެންދާތީ، އެކަމުގެ ދަތިތައް އާއްމުންނަށް ކުރިމަތިވަމުންދާ ކަމުގެ ޝަކުވާތައް ލިބެމުން އަންނަ ކަމަށެވެ.
އޭގެތެރޭގައި ހިނގާބިނގާވެ އުޅޭ ފަރާތްތަކަށް ދަތިވާ ގޮތަށް ދުވާރުތައް ބޭނުން ކުރުމާއި ސްކޫލްތައް ހިމެނޭ ސަރަހައްދުތަކުގައި ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ދުމުގެ ނޭދެވޭ އަސަރުކުރުމާއި އަދަބާ ހިލާފު އިބާރާތްތަކުން މުއާމަލާތްތައް ކުރުމުގެ ޝަކުވާތައް ބެލެނިވެރިންގެ ފަރާތުންނާއި ސްކޫލްތަކުން އެ ކޯޕަރޭޝަނަށް ހުށަހަޅާފައިވާ ކަމަށް އެޗްޑީސީން ވަނީ ބުނެފަ އެވެ.
އެހެންކަމުން ދުވާރުމައްޗާއި ހެޖުތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުސޫލުން ބޭނުންކުރުމަކީ މަނާކަމެއް ކަމުގައި އެޗްޑީސީން ވަނީ އަންގާފަ އެވެ.
އެޗްޑީސީން ވަނީ ވިޔަފާރިކުރާ ފަރާތްތަކުން ކަނޑައެޅިފައިވާ އުސޫލުތަކާ އެއްގޮތަށް އަމަލު ކުރުމަށް އިލްތިމާސްކޮށްފަ އެވެ. އަދި އެ އުސޫލާ ހިލާފަށް ވިޔަފާރި ކުރާ ފަރާތްތަކާ މެދު ކަމާ ގުޅުން ހުރި ވުޒާރާތައް މެދުވެރިކޮށް އުސޫލުގެ މަތިން އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށް ވަނީ ބުނެފަ އެވެ.
