މުނައްވަރު މިހެން ވިދާޅުވީ ގަވަރުނަރުގެ މަގާމަށް އޭނާ އައްޔަންކުރަން ރައްޔިތުން މަޖިލީހުގެ މާލިއްޔަތު ކޮމެޓީން ދިރާސާކުރާ މައްސަލާގައި މިއަދު ބޭއްވި އިންޓާވިއުގަ އެވެ.
އިންޓާވިއުގައި ވާހަކަ ދައްކަވަމުން މުނައްވަރު ވިދާޅުވީ ސަރުކާރުން ރައްޔިތުންނާއި ގައުމަށް ފައިދާވާ ކަމެއް ކުރާނަމަ އެކަމަށް ހުރަހެއް ނާޅާނެކަމަށެވެ. އެހެންނަމަވެސް ރައްޔިތުންނަށް ގެއްލުންވާ ފަދަ ކަމެއް ސަރުކާރުން އެމްއެމްއޭ މެދުވެރިކޮށް ކުރާނަމަ އެކަމާއި ދެކޮޅަށް އަޑު އުފުލާ އިސްތިއުފާ ދިނުމުގެ ހިތްވަރު ހުންނާނެކަމަށެވެ. އަދި އެއީ މިނިވަން މުވައްސަސާގެ ގާނޫނީ ވާޖިބެއްކަމަށްވެސް މުނައްވަރު ވިދާޅުވި އެވެ.
މުނައްވަރު ވިދާޅުވީ ސަރުކާރު ހަމަ ބޭނުންވާއިރަށް ފައިސާ ޗާޕުކުރުމަކީ ގަބޫލުކުރާ އުސޫލެއް ނޫންކަމަށެވެ. އަދި ގާނޫނީ ތަރަހައިގެ ތެރެއިން މެނުވީ ފައިސާ ޗާފުނުކުރާނެކަމަށްވެސް މުނައްވަރު ވިދާޅުވި އެވެ.
މިނިވަން މުވައްސަސާ ކޮމެޓީން ވަނީ މާދަމާގެ ކުރިން މުނައްވަރު ގަވަރުނަރުގެ މަގާމަށް އައްޔަންކުރަން ކޮމެޓީން ކުރަންޖެހޭ މަސައްކަތްތައް ނިންމުމަށް ފާސްކޮށްފަ އެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ ގޮތުގައި ކުރިން ހުންނެވި އަލީ ހާޝިމް އެ މަގާމުން ވަކިކުރީ މިމަހުގެ 22 ވަނަދުވަހު އެވެ.
