ޔާމީން ރަޝީދު މަރާލި މައްސަލައިގެ އިސްތިއުނާފު ޝަރީއަތުގައި ސިއްރުން ހެކިބަސް ދިން މީހަކީ އެކަމުގައި ބައިވެރިވުމުގެ ތުހުމަތުގައި ފުލުހުން ހައްޔަރުކޮށް، ދައުލަތުން ކުރިން ދައުވާ ކޮށްފައިވާ މީހެއް ކަމަށް ދިފާއީ ވަކީލުން ތުހުމަތު ކޮށް، ޝަރީއަތުގައި މިއަދު ބުނީ، އެކަން ދައުލަތުން ސިއްރު ކޮށްފައިވާ ކަމަށެވެ.
ޔާމީން ރަޝީދުގެ މަރުގެ މައްސަލައިގައި ދައުލަތުން އޭރު ދައުވާކުރީ ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ކުދެހިގޭ ހަސަން ޝިފާޒާއި މ. ތާއިފް އިސްމާއިލް ރަޝީދުގެ އިތުރުން މ. ކޮޅުފުށީ އީސްޓް ހުސައިން ޒިޔާދުގެ މައްޗަށެވެ. އޭގެ ތެރެއިން ހައިޝަމާއި ޒިހާންގެ މައްޗަށް ކުށް ސާބިތުވެ، އެ ދެ މީހުން އުމުރަށް ޖަލަށްލާން ކްރިމިނަލް ކޯޓުން 2022 ވަނަ އަހަރު ހުކުމް ކުރިޔަސް، ދެން ތިބި މީހުން ވަނީ ސަލާމަތްވެފަ އެވެ.
ހައިޝަމާއި ޒިހާން އިސްތިއުނާފް ކުރި މައްސަލައިގައި ވަކީލުން ބުނީ ޔާމީން މަރާލި މައްސަލާގައި ހެކިބަސް ދިން ސިއްރު ހެކިވެރިއަކީ އެ މައްސަލާގައި ކުރިން ހައްޔަރުކޮށް، އޭނާގެ މައްޗަށް ދައުލަތުން ކްރިމިނަލް ކޯޓުގައި ދައުވާ ވެސް ކުރި ކަމަށެވެ.
ވަކީލުން ބުނިގޮތުގައި، ޔާމީން މަރާލަން ދައުވާލިބޭ މީހުން މިސްކިތެއްގެ ތެރޭގައި މަޝްވަރާކުރި އަޑުއިވުނު ކަމަށާއި އަދި ޔާމީން މަރާލި ފަހުން ފިހާރައެއްގެ ތެރޭގައި އެ މީހުން އެ ވާހަކަ ދެއްކި އަޑުއިވުނު ކަމަށް އެ ހެކިވެރިޔާ ކޯޓުގައި ބުންޏަސް، އެކަމުގައި ބައިވެރިވި ނުވާ ނަމަ އެ ވާހަކަތައް ހެކިވެރިޔާއަށް އަޑުއިވުނު ގޮތާ މެދު ސުވާލު އުފެދެ އެވެ.
އެ މައްސަލާގައި ހައިޝަމާއި ޒިހާން ޖަލަށްލާން ކުރި ހުކުމް އެ މީހުންގެ ފަރާތުން އިސްތިއުނާފް ކުރިއިރު، އިސްމާއިލް ރަޝީދާއި ދިފްރާންގެ މައްޗަށް ކުށް ސާބިތުނުވި މައްސަލަ ދައުލަތުން ވެސް އޮތީ ހައި ކޯޓުގައި އިސްތިއުނާފް ކޮށްފަ އެވެ.
