އެ ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވީ 731 މުވައްޒަފުން ވަކިކުރަން ނޯޓިސް ފޮނުވާފައިވާކަމަށާއި އެ މުވައްޒަފުންނަކީ އެކި ޕްރޮޖެކްޓްތަކަށް ނަގާފައިވާ މުވައްޒަފުންކަމަށެވެ. އެގޮތުން އެއީ އިމާރާތްކުރުމުގެ މަސައްކަތަށް ނަގާފައި ތިބި މުވައްޒަފުންކަމަށް މުއާޒު ވިދާޅުވިއެވެ.
މި މުވައްޒަފުން މަދުކުރުމުން ކުންފުންޏަށް މަހެއްގެ މައްޗަށް 7 މިލިއަނާއި 9 މިލިއަން ރުފިޔާއާ ދެމެދުގެ އަދަދެއް ސަލާމަތް ކުރެވޭނެކަމަށްވެސް މުއާޒު ވިދާޅުވިއެވެ.
ވަކިކުރަން ނޯޓިސް ފޮނުވު މުވައްޒަފުން ނޯޓިސް މިމަހުގެ 15 އަށް ހަމަވާއިރު އެ މުވައްޒަފުން ނެގި މަސައްކަތް ނިމި ނުވަތަ އެ މަސައްކަތް ކުރިޔަށް ނުގެންދަން ކުންފުނިން ނިންމާފައިވާކަންވެސް މުއާޒު ވަނީ ފާހަގަކުރައްވާފައެވެ.
ވަޒީފާއިން ވަކިކުރާތީ ބައެއް މުވައްޒަފުން އަންނަނީ ނުރުހުން ފާޅުކުރަމުންނެވެ.
ފެނަކަ ކުންފުނީގެ ދަރަނި 4.3 ބިލިއަން ރުފިޔާ އަރާކަމަށެވެ. އަދި ކުންފުނިން އޮތީ އޮޕަރޭޝަނަށް ވެސް ބުރޫ އަރާ ހާލަތުގައިކަމަށް މުއާޒު ވަނީ ކުރިން ވިދާޅުވެފައެވެ.
މުއާޒު ވިދާޅިވީ ކުންފުނީގެ ސީއެސްއާރުން މިދިޔަ އަަހަރު އެކަނިވެސް 10 މިލިއަން ހޭދަކޮށްފައިވާކަމަށެވެ. އަދި އޭޓީއެމް އިމާރާތްތަކެއް ހަދަންވެސް އެތައް މިލިއަނެއް ފެނަކައިން ހަރަދުކޮށްފައިވާކަމަށެވެ.
