ރައީސް މައުމޫން އެކްސްގައި ކުރެއްވި ޕޯސްޓެެއްގައި ގައްޒާގެ މައްސަލާގައި އަރަބި ދުނިޔެއިން ކަންކުރަމުން އަންނަ ގޮތުން ވަނީ ނުރުހުން ފާޅުކުރައްވާފައެވެ. އެމަނިކުފާނު ވިދާޅުވީ އިޒްރާއިލުން ހިންގާ ލާއިންސާނީ އަމަލުތައް ބަލަން އަރަބި ލީޑަރުން ތިބިކަމަށެވެ.
ފަލަސްތީނުގެ މިނިވަންކަމަށް ގޮވާލާ ރައީސް މައުމޫން އަބަދުވެސް ގެންދަވަނީ ވަކާލާތުކުރައްވަމުންނެވެ.
މިދިޔަ އަހަރުގެ އޮކްޓޫބަރު 7ން ފެށިގެން ޔަހޫދީ ފައުޖުތަކުން ފަލަސްތީނުގެ ރައްޔިތުން ނެތިކޮށްލުމަށް އަމާޒުކޮށް ދެމުން އަންނަ ލައިންސާނީ ހަމަލާތަކުގައި ޝަހީދުވި މީހުންގެ އަދަދު ވަނީ 39،600 ވުރެ މައްޗަށް އަރާފައެވެ. އަދި އޭގެތެރޭގައި 16،000 ވުރެ ގިނަ މައުސޫމް ކުޑަކުދިން ހިމެނެއެވެ. ޔަހޫދީންގެ ހަމަލާތަކުގައި ޒަހަމްވި މީހުން އަދަދު އެއްލަކާއި ގާތްކުރާކަމަށް ރިޕޯޓްތައް ބުނެއެވެ. އަދި ވެއްޓިފައިވާ އިމާރާތްތަކުގެ ދަށުގައި ތާށިވެފައި ތިބި މީހުންގެ އަދަދުވެސް 10 ހާހުން މައްޗަށް އަރާނެކަމަށްވެސް ރިޕޯޓްތައް ބުނެއެވެ.
