ބިންވެރިޔާ ސްކީމުން ގޯތި ލިބުނު މީހުންނަށް ބިން ދޫކުރުމުގެ މަސައްކަތް އަންނަނީ ކުރަމުންނެވެ. އެކަމަކު، އޭގެ ތެރެއިން ބައެއް ބިންތައް ހިއްކާ ނުނިމޭތީ އެ ކަމުގެ ކަންބޮޑުވުން ބޮޑެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ، ބިންވެރިޔާ ސްކީމްގެ ދަށުން ބިން ލިބިފައިވާ ފަރާތްތަކުގެ ތެރެއިން އެޕްލިކަންޓެއް ނުވަތަ އެޕްލިކަންޓް މަރުވެފައިވާ ފަރާތްތަކުން ޝަރުއީ ކޯޓުން ވާރިސުން ސާބިތުކުރަން ޖެހޭނެ ކަމަށެވެ.
އަދި ގަޒިއްޔާ ނިމުނު ގޮތުގެ ރިޕޯޓާ އެކު، ހިޔާވެހި ޕޯޓަލް މެދުވެރިކޮށް އެޕޮއިޓްމަންޓަށް އެދުމުން އެއްބަސްވުމުގައި ސޮއިކުރުމުގެ އިންތިޒާމު ހަމަޖައްސާނެ ކަމަށެވެ.
ހައުސިން މިނިސްޓްރީން ކުރިން ބުނެފައިވާ ގޮތުގައި، ބިން ލިބުނު ފަހުން 12 މީހަކު މަރުވެފައިވެ އެވެ.
މިދިޔަ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމިއެވެ. އެ ސްކީމްގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.
މިހާތަނަށް ހުޅުމާލެއިން 624 ގޯތި ދޫކޮށްފައިވާ ކަމަށް ހައުސިން މިނިސްޓްރީން މީގެ ކުރިން ބުނެފައިވެ އެވެ.
ހައުސިން މިނިސްޓަރު ޑރ. އަލީ ހައިދަރު އިއްޔެ ރައްޔިތުންގެ މަޖިލީހުގައި ވިދާޅުވެފައި ވަނީ ގުޅިފަޅުން ގޯތި ދޫކުރެވޭނީ އެތަން ހިއްކައި ނިމި އަދި މާލެ ކަނެކްޓިވިޓީ ބްރިޖްގެ މަސައްކަތް ވެސް ނިމިގެން ކަމަށެވެ. އެއީ އެތަނަކީ މިހާރު ކޮންސްޓްރަކްޝަން ސައިޓަކަށް ވާތީ އެވެ.
ހުޅުމާލެ ދެވަނަ ފިޔަވަހިން ދޭން ހުރި ގޯތިތައް އޮކްޓޯބަރުގައި އަދި ހުޅުމާލެ ތިންވަނަ ފިޔަވަހިން ނޮވެމްބަރުގައި ގޯތި ދެވޭނެ ކަމަށް މިނިސްޓަރު ވިދާޅުވި އެވެ. އެ ދެ ސަރަހައްދު ވެސް ދަނީ ހިއްކަމުންނެވެ. އޭގެ އިތުރުން ގިރާވަރުފަޅުން ވެސް ގޯތި ދެވޭނީ ހިއްކައި ނިމުމުން ކަމަށާއި، ނުހިއްކާ ތަނަކުން އިން ކަނޑައި ރަޖިސްޓްރީ ނުދެވޭނެ ކަމަށް މިނިސްޓަރު ވިދާޅުވެފައިވެ އެވެ.
