އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ޕޭޕަލްއަށް ދިމާވެފައިވާ މައްސަލަތައް ހައްލުކުރުމަށް ޕޭޕަލް ކުންފުނީގެ ގްލޯބަލް މާކެޓިން ޕްރެސިޑެންޓް އާ މިއަދު ބައްދަލުކުރެއްވި ކަމަށެވެ.
ވާޗުއަލްކޮށް ކުރިއަށް ގެންދިޔަ މި ބައްދަލުވުމުގައި ޕޭޕަލްގެ ގްލޯބަލް މާކެޓިން ޕްރެސިޑެންޓް އާއެކު މަޝްވަރާކުރެއްވީ ޕޭޕަލް މެދުވެރިކޮށް ފައިސާ ލިބުމުގެ ދަތިކަމުން އަރައިގަނެ ރާއްޖޭގެ އީ-ކޮމާސްއަށް އަށް އެހީތެރިވެވިދާނެ މަގެއް ހޯދުމަށްކަމަށް ސައީދު ވިދާޅުވި އެވެ.
ބޭރު ރުފިޔާ ޓްރާންސްފާ ކުރުމުގެ ޕްލެޓްފޯމްތަކާއި ޑިޖިޓަލް ވޮލެޓް ހިމެނޭހެން, ބޭންކް އޮފް މޯލްޑިވްސް(ބީއެމްއެލް) އިން ކުރިން ބްލޮކްކޮށްފައިވާ ބޭރުގެ މާޗަންޓުން އަންބްލޮކް ކޮށް މުއާމަލާތް ކުރެވޭގޮތް ހަަމަޖެއްސީ މިދިޔަ މާޗް މަހުގެ ތެރޭގަ އެވެ.
ރާއްޖޭގައި ކްރިއޭޓިވް ނުވަތަ ފަންނީ ސިނާއާތްތަކަށް ފަހިވާ އިކޮނޮމީއެއް ގާއިމްކުރުމަށްޓަކައި ޕޭޕަލް ހިމެނޭހެން އޮންލައިން ޕޭމަންޓް ޕްލެޓްފޯމްތައް މެދުވެރިކޮށް، ފައިސާ ލިބިގަތުމަށް ހުރި ހުރަސްތައް ނައްތާލުމަކީ ރައީސް މުއިއްޒުގެ ރިޔާސީ ވައުދެކެވެ.
