އެ މަގާމަށް އޭނާ އައްޔަންކުރައްވާފައިވަނީ ޕީއެސްއެމްގައި އެމްޑީއަކަށް ހުންނެވި ޒީނާ ޒާހިރު މަގާމުން އިސްތިއުފާދެއްވިތާ މާ ގިނައިރުތަކެއް ނުވަނީސް އެވެ.
ޒީނާ އިސްތިއުފާދެއްވި ސަބަބު ހާމައެއް ނުކުރައްވައެވެ. އެހެންނަމަވެސް ޒީނާ މަގާމުން އިސްތިއުފާ ދެއްވިތާ ކުޑަ ވަގުތުކޮޅެއްގެ ތެރޭގައި ސައީދު އައްޔަން ކުރުމުން ބެލެވެނީ ޒީނާ މަގާމުން ވަކިކުރާކަން އެނގިވަޑައިގަތުމުން އިސްތިއުފާދެއްވީކަމަށެވެ.
ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރުކަމަށް ޒީނާ ޒާހިރު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން އައްޔަންކުރީ މިދިޔަ އަހަރުގެ ނޮވެންބަރު 28 ގައެވެ.
ސަރުކާރު ކުންފުނިތަކުގެ ކަންކަން ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީން ) ވަނީ ޕީއެސްއެމްގެ ޑިރެކްޓަރުންގެ ބޯޑުގެ މެމްބަރުކަމާއި މެނޭޖިންގ ޑިރެކްޓަރު ކަމުގެ މަޤާމަށް ސައީދު އައްޔަންކުރިކަން އެ ކުންފުންޏަށް އަންގާފައެވެ. އަދި ޕީއެސްއެމުން ވަނީ އެކަން ކުރިހާ މުވައްޒަފުންނަށް ވެސް އަންގާފައެވެ.
މުހައްމަދު ސައީދު ވަނީ އިނގިރޭސިވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ޑިގްރީ ހާސިލް ކުރައްވާފައެވެ. އަދި އޭނާ ވަނީ ތައުލިމީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރައްވާފައެވެ. އެންމެ ފަހުން ހުންނެވި އެޑިއުކޭޝަން މިނިސްޓްރީގެ ޕާމަނަންޓް ސެކެރެޓަރީގެ މަގާމުގައެވެ.
