އިނގިރޭސިވިލާތަށް އުފަން ހަމްޒާގެ މަންމައަކީ ބަންގްލަދޭޝްގެ ސިލެޓް ޑިވިޝަނަށް ނިސްބަތްވާ މީހެކެވެ. ރިޕޯޓްތައް ބުނާ ގޮތުން ބަންގްލަދޭޝްގެ ޕާސްޕޯޓް މިހާރުވަނީ ޗައުދަރީ ހޯދާފައެވެ. އެކަން ބަންގްލަދޭޝް ފުޓްބޯޅަ ފެޑެރޭޝަންގެ ޖެނެރަލް ސެކްރެޓަރީ އިމްރާން ހުސައިން ތުޝާރު ވަނީ މީޑީއާއަށް ކަށަވަރުކޮށްދީފައެވެ.
ހަމްޒާ ޗައުދަރީ ބަންގްލަދޭޝްގެ ގައުމީ ޓީމަށް ކުޅެން ނިންމައި، އެކަމުގައި ފުރިހަމަ ކުރަން ޖެހޭ އިޖުރާތުތައް ފުރިހަމަ ކުރުމުގެ އެންމެ ފަހު މަރުހާލަގައި މިހާރު އުޅޭއިރު، ބަންގްލަދޭޝް ފެޑެރޭޝަނުން ލަފާކުރާ ގޮތުގައި އަންނަ ސެޕްޓެމްބަރު ހިސާބުގައި ހަމްޒާ ޗައުދަރީގެ ކްލިއަރެންސްގެ ހުރިހާ ކަމެއް ނިމި، އޭނާއަށް ބަންގްލަދޭޝްގެ ގައުމީ ޓީމަށް ކުޅެވޭނެއެވެ. އެހެންކަމަށް ވެއްޖެނަމަ، ދެން އޮންނަ ސާފް ޗެމްޕިއަންޝިޕްގައި ހަމްޒާ ޗައުދަރީ ކުޅުމަކީ އެކަށީގެންވާ ކަމެކެވެ.
ހަމްޒާ ޗައުދަރީވަނީ އިގިރޭސި 21 އަހަރުން ދަށުގެ ގައުމީ ޓީމަށް ކުޅެފައެވެ. އަދި އޭގެ އިތުރުން އިގިރޭސި އެފްއޭކަޕް ކާމިޔާބު ކުރި ލެސްޓަ ސިޓީގެ ޓީމުގައާއި އެފްއޭ ކޮމިއުނިޓީ ޝީލްޑް އަދި މިދިޔަ ސީޒަންގެ އިގިރޭސި ދެވަނަ ޑިވިޝަން ކާމިޔާބު ކުރި ލެސްޓަ ސިޓީގެ ޓީމުގައި އޭނާ ހިމެނިފައިވެއެވެ. ހަމްޒާ ޗައުދަރީ ބަންގްލަދޭޝްގެ ގައުމީ ޓީމަށް ކުޅެފިނަމަ އޭނާ ވެގެންދާނީ ދެކުނު އޭޝިއާ ސަރަހައްދުގެ އެންމެ ހައި ޕްރޮފައިލް އެއް ކުޅުންތެރިޔާއަށެވެ. އޭނާވަނީ ޖެމީ ވާޑީ އަދި ފިލް ފޯޑެން ފަދަ މަޝްހޫރު އެތައް ކުޅުންތެރިންނަކާ އެކު ކުޅެފައެވެ.
