މަނީ ލޯންޑަރިންގެ ތުހުމަތުގައި ހައްޔަރުކޮށް ހޯމަ ދުވަހު ބަންދު މުއްދަތު ޖަހާފައިވަނީ ޝަހްމިން އިސްލާމް ޝަގުރް ކިޔާ އުމުރުން 31 އަހަރުގެ ބަންގްލަދޭޝް ފިރިހެނެކެވެ. އޭނާގެ ބަންދަށް ހޯމަ ދުވަހު 15 ދުވަސް ޖަހާފައިވެއެވެ. އޭނާގެ ބަންދަށް 15 ދުވަސް ކޯޓުން ޖެހިއިރު، ބަންގަލަދޭޝް މީހަކު ވަގަށް ރާއްޖެއިން ބޭރުކުރަން އުޅުނު 80 ހާސް ޑޮލަރާއެކު އާދިއްތަ ދުވަހުވަނީ އަތުލައިގެންފައެވެ.
އާދިއްތަ ދުވަހު އޭވިއޭޝަން ކޮމާންޑުން ބުނީ މި މީހާ އަތުލައިގަތީ ޔޫއެސް ބަންގްލާ އެއާލައިނުން ފުރަން އުޅެނިކޮށްކަމަށެވެ. އެ އިދާރާއިން ބުނީ މި މީހާ ފޮރުވައިގެން ބޭރުކުރަން އުޅުނީ 81030 ޑޮލަރުކަމަށެވެ. އޭވިއޭޝަން ކޮމާންޑުން ބުނީ މި މީހާ މި ޑޮލަރުތައް ރާއްޖެއިން ބޭރުކުރަން މަސައްކަތް ކުރީ ލަގެޖްގައި ފޮރުވައިގެން ގަވާއިދާއި ހިލާފަށްކަމަށެވެ. އެ އިދާރާއިން އާއްމުކުރި ފޮޓޯތަކާއި ވިޑިއޯއިން ފެންނަ ގޮތުން މި މީހާ މިހާ ގިނަ އަދަދެއްގެ ޑޮލަރު ފޮރުވާފައި ހުރީ ކޯން ޕްލޭކްސް ފޮއްޓެއްގެ ތެރޭގައެވެ.
އޭނާ ވަނީ އެއީ ކޯން ޕްލޭކްސްކަމަށް ދެއްކުމަށް އޭގައި އިންނަ ފޮއިލް ޕެކުގައިވެސް ބަންދުކޮށްފައެވެ. އޭގެތެރެއަށް އޭނާ އެތަކެތި ލާފައިވަނީ ބޮނޑި ބޮންޑިއަށް ބަދެ ހަ ބޮނޑީގެ ގޮތުގަ އެވެ.
ކުރިން ބޭރު ކުރިހެން ނަގުދު ފައިސާ ރާއްޖޭން ބޭރު ނުކުރެވޭ ގޮތަށް ކަސްޓަމްސްގެ ކޭޝް ޑެކްލަރޭޝަނަށް ބޮޑު ބަދަލެއް ދާދި ފަހުން ވަނީ ގެނެސްފަ އެވެ. އެގޮތުން ރާއްޖޭން ބޭރަށް 10،000 ޑޮލަރަށް ވުރެ އިތުރަށް (ދިވެހި ނުވަތަ ބޭރު ފައިސާ) ހިފައިގެންދާ މީހާ ހިފަހައްޓާ އެއީ ކޮންތާކުން، ކިހިނެއް ހޯދި ފައިސާއެއްތޯ ގާނޫނީ އިމުގެ ތެރެއިން ބަލާ ސުވާލުކުރާނެއެވެ.
