Advertisement

ޓެކްސް ނެގުމާބެހޭ އިދާރީ ގާނޫނު އޮންނަ ގޮތުން ޓްރައިބިއުނަލަށް މެމްބަރުން އައްޔަންކޮށް، ވަކި ކުރައްވާނީ ރައީސްއެވެ.

ޓެކްސް ޓްރައިބިއުނަލްގެ 4 މެމްބަރުން ވަކިކުރަން ރައްޔިޔުން މަޖިލީހުން ރައީސް މުއިއްޒަށް ލަފާއެރުވީ މިމަހުގެ 19 ވަނަ ދުވަހުއެވެ. އެ ނިންމުމާއި އެއްގޮތަށް މަގާމުން ވަކިކުރިކަން ރައީސް އޮފީހުން މިއަދު ވަނީ އެ މެމްބަރުންނަށް އަންގާފައެވެ.

ޓެކްސް އެޕީލް ޓްރައިބިއުނަލުން ވަކިކުރަން ނިންމި މެމްބަރުން 

1. މުހައްމަދު މުނައްވަރު އަލީ / ޓްރައިބިއުނަލްގެ ރައީސް
2. ހސެއިން ޒައިދާން ޖަލީލް / ޓްރައިބިއުނަލްގެ ނައިބު ރައީސް
3. ހަދީޖާ ނައީމް / ޓްރައިބިއުނަލްގެ މެމްބަރު
4. އަހުމަދު އަޝްރަފް / ޓްރައިބިއުނަލްގެ މެމްބަރު

ފަސް މެމްބަރުން ތިބޭ ޓްރައިބިއުނަލުން ވަކި ނުކުރަން ނިންމީ  މެމްބަރު އިސްމާއީލް ސާޖިދުއެވެ. އޭނައަކީ އެ ޓްރައިބިުނަލުން ހިންގަމުންދިޔަ ބޮޑެތި ކޮރަޕްޝަންތައް މަޖިލީހުގެ ސަމާލުކަމަށް ގެނައި މެމްބަރެވެ. 

މިއަދު ރައީސް އޮފީހުން ކުރި އިއުލާނުގައި ބުނީ:

• މަދުވެގެން އެއް މެންބަރަކު ވާންވާނީ ރާއްޖޭގައި ނުވަތަ އެހެންވެސް ތަނެއްގައި ޓެކްސްއާބެހޭ ގާނޫނީ ތަޖުރިބާ ހާސިލުކޮށްފައިވާ، ނުވަތަ ޓެކްސް އެކައުންޓެންސީގެ ދާއިރާގައި އަމަލީ ގޮތުން މަސައްކަތްކޮށްފައިވާ މީހަކަށެވެ.
• މަދުވެގެން ދެ މެންބަރަކު ވާންވާނީ ރާއްޖޭގައި ގާނޫނީ ދާއިރާގައި މަސައްކަތްކޮށް މަދުވެގެން ތިން އަހަރު ދުވަހުގެ ތަޖުރިބާ ލިބިފައިވާ ނުވަތަ ގާނޫނީ ދާއިރާއިން މަތީ ތައުލީމް ހާސިލުކޮށްފައިވާ މީހުންނަށެވެ.

ޓެކްސް އެޕީލް ޓްރައިބިއުނަލްގެ މެންބަރުކަމަށް ކުރިމަތިލުމަށް އެދޭ ފޯމާއި، އިޤްރާރާއި ކުށާއި ދަރަނީގެ ރެކޯޑް ފޯމާއި، ސިޔާސީ ޕާޓީއެއްގައި ރަޖިސްޓަރީ ވެފައިވޭތޯ ބެލުމަށް އިލެކްޝަންސް ކޮމިޝަނުން ސާފުކުރަންޖެހޭ ފޯމު ބަލައިގަތުމަށް ހަމަޖެހިފައިވަނީ، ސެޕްޓެންބަރު 17 ވަނަ ދުވަހުގެ ހެނދުނު 09:30 އިން މެންދުރުފަހު 12:00 އަށް، ރައީސް އޮފީހުންނެވެ