މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) އެއްކޮށްލަން ވަޒީރުންގެ މަޖިލީހުން މިއަދު ނިންމާފައިވާކަމަށް ސަރުކާރުން ވަނީ ބުނެފައެވެ. މި ދެކުންފުނި އެއްކޮށްލަން ނިންމާފައިވަނީ ސަރުކާރުގެ ހަރަދުތައް ކުޑަކުރަން ކުންފުނިތައް ރިފޯމް ކުރުމަށް ކުރަމުންދާ މަސައްކަތުގެ ތެރެއިންކަމަށެވެ.
މިއަދުގެ ވަޒީރުންގެ މަޖލީހުގެ ނިންމުމާއި ގުޅޭ މައުލޫމާތުތައް ހާމަކުރައްވަމުން އިގްތިސާދާއި ބެހޭ ވަޒީރު ބުނީ އެމްއޭސީއެލާއި އާރުސީއެލް އެއްކޮށް ނިންމާލަން އެޖެންޑާކޮށްފައިވަނީ އަންނަ އަހަރުގެ ޖެނުއަރީ 31ގެ ނިޔަލަށްކަމަށެވެ. އަދި އެ މުއްދަތަށް ކޯޕަރޭޓް ގަވަނެންސްގެ އުސޫލުން، ދެ ކުންފުނިން ނިންމަންޖެހޭ ނިންމުންތަކާއި އެޑްމިނިސްޓްރޭޓިވް ނިންމުންތައް ނިމޭނެކަމަށް ވަޒީރު ސައީދު ވިދާޅުވިއެވެ.
އެމްއޭސީއެލްއިން މިހާތަނަށް ބަލަހައްޓަމުން އައީ ހަމައެކަނި ވެލާނާ އިންޓަނޭޝަނަލް އެއާޕޯޓެވެ. ރާއްޖޭގައި ދެން ހުރިހާ އެއާޕޯޓެއް ބަލަހައްޓަމުން އަންނަނީ ރީޖަނަލް އެއާޕޯޓްސްއިންނެވެ. ސައީދު ވިދާޅުވީ މި ބަދަލާއިއެކު ހަނީމާދޫ ހިމެނޭހެން 8 އެއާޕޯޓެއް މި މަސައްކަތުގެ ތެރޭގައި އެއްކޮށްލެވިގެންދާނެކަމަށެވެ.
މީގެއިތުރުން ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ)އާއި ފަހި ދިރިއުޅުން ކޯޕަރޭޝަން (އެފްޑީސީ) އެއްކޮށްލަން އަދި މޯލްޑިވްސް ފަންޑް މެނޭޖްމަންޓް ކޯޕަރޭޝަނާއި ބިޒްނަސް ސެންޓަރު ކޯޕަރޭޝަން (ބީސީސީ)އާ އެއްކުރަންވެސް މިއަދު ވަޒީރުން މަޖިލީހުން ވަނީ ނިންމާފައެވެ.
