ފަލަސްތީނުގެ ނޫސް އެޖެންސީއެއް ކަމުގައިވާ "ވަފާ" އިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، ޔަހޫދީ ސިފައިންގެ ހައްދުފަހަނައަޅާފައިވާ ހަމަލާތަކުގައި ފަލަސްތީނުގެ 165 ނޫސްވެރިއަކު ޝަހީދުކޮށްލާފައިވެ އެވެ. އަދި ކުރިއަށް އޮތް ދުވަސްތަކުގައި މި އަދަދު ބޮޑުތަނުން އިތުރުވެދާނޭ ކަމަށް ބެލެވޭކަމަށް ވެސް ރިޕޯޓް ކުރެވިފައިވެ އެވެ.
ޔަހޫދީ ސިފައިން ގާޒާއަށް ދެމުންދާ ފަނާކުރަނިވި ހަމަލާތަކުގެ ސަބަބުން މެދުއިރުމަތީގައި މިހާރުވެސް ވަނީ ހުޅުހިފާފަ އެވެ. ގާޒާގެ ރައްޔިތުން ބަނޑަށް ޖެއްސުމާއި ދިރި ތިއްބައި އެންދުން ފަދަ އަނިޔާތައް ޔަހޫދީން ދަނީ އާންމުނަށް ކުރަމުންނެވެ.
ޔަހޫދީންގެ ހަމަލާތަކުގައި ގާޒާއިން 40700 އަށް ވުރެ ގިނަ މީހުން މިހާތަނަށް ވަނީ ޝަހީދުވެފަ އެވެ. ޔަހޫދީންގެ ރަހުމު ކުޑަ ހަމަލާތަކުގައި ޒަހަމު ކޮށްލާފައިވާ މީހުންގެ އަދަދު ވަނީ 94224އަށް އުފުލިފަ އެވެ. އެކަމަކު އަދިވެސް ހަނގުރާމަ ނިންމާނެ ދުވަހެއް އެކަކަށް ވެސް ނޭނގެ އެވެ.
