މިދިޔަ އަހަރުގެ ޗެމްޕިއަން ޑީޖޭއޭ، ހެލްތާ ދެކޮޅަށް ކުޅޭ މެޗު ފެށޭނީ މިރޭ އަށެއް ޖަހާއިރުއެވެ. މި ފަހަރު ޑީޖޭއޭއާއެކު އެއް ގްރޫޕެއްގައި ހެލްތު މިނިސްޓްރީގެ އިތުރުން ދެން ހިމެނެނީ ޓުއަރިޒަމް މިނިސްޓްރީ އަދި މާލޭ ސިޓީ ކައުންސިލްއެވެ.
ކްލަބު މޯލްޑިވްސް ކްލަސިކްގެ ޗެމްޕިއަންކަން، މިދިޔަ އަހަރު ފައިނަލުގައި ޕީޖީ އޮފީސް ބަލިކޮށް ހޯދީ ޖުޑީޝަރީންނެވެ. މި ދެ ޓީމުވެސް މި އަހަރުވެސް ބައިވެރިވެއެވެ.
މިދިޔަ އަހަރުގެ ފައިނަލް މެޗުން ޓީމް ޑީޖޭއޭ މޮޅުވީ ހަތް ލަނޑު ދެ ލަނޑުގެ ބޮޑު ތަފާތަކުންނެވެ. އެ ނަތީޖާއާއެކު މުބާރާތުގެ ޗެމްޕިއަންކަން ޑީޖޭއޭއިން ހޯދީ ކުޅުނު ހުރިހާ މެޗަކުން މޮޅުވެ، ސައްތައިން ސައްތަ ރެކޯޑަކާއެކުއެވެ.
ކްލަބު މޯލްޑިވްސް ކަޕް ކްލެސިކްގެ މިދިޔަ އަހަރުގެ ފައިނަލް މެޗުގެ އެންމެ މޮޅު ކުޅުންތެރިއަކަށް ހޮވުނީ މުބާރާތުގެވެސް މޮޅު ކުޅުންތެރިޔާގެ މަގާމް ހޯދި ޑީޖޭއޭގެ ސައުދުއްﷲއެވެ. މުބާރާތުގެ އެންމެ ގިނަ ލަނޑު ޖެހި ދެ ކުޅުންތެރިންގެ ތެރޭގައިވެސް ސައުދުﷲ ހިމެނުނެވެ.
މިދިޔަ އަހަރުގެ ފައިނަލް މެޗުގައި ޑީޖޭއޭގެ އަޖުވަދުވަނީ ހެޓްރިކެއް ހަދާފައެވެ. އެއީ މެޗުގެ ފުރަތަމަ މިނިޓްގެ ތެރޭގައި ޖެހި ދެ ލަނޑާ، ފަހުން ލިބުނު ޕެނަލްޓީއަކުން ޖެހި ލަނޑެކެވެ. އަޖުވަދުވަނީ ފައިނަލް މެޗުގެ އިތުރުން މުޅި މުބާރާތުގައިވެސް މޮޅު ކުޅުމެއް ދައްކާފައެވެ. މި ދެ ކުޅުންތެރިންވެސް މި ފަހަރުވެސް ކުޅޭނެއެވެ.
