ސްކޫލަކަށް ވަދެ ޓީޗަރުންނަށް ބިރު ދެއްކިކަމުގެ ތުހުމަތުގައި ހައްޔަރުކޮށްފައި ހުރީ މއ. ކަނޑޫގެ، އަލީ އަހްމަދު އެވެ. މީގެ މަހެއް ކުރިން އޭނާ ހައްޔަރުކޮށް ދެވަނަ ފަހަށް އޭނާގެ ބަންދު މުއްދަތު އިތުރުކޮށްފައިވާއިރުވެސް އެކަމުގައި އެޑިއުކޭޝަން މިނިސްޓްރީން މިހާތަނަށް އެއްޗެއް ނުބުނެ އެވެ.
އަލީ އަހްމަދު ހައްޔަރުކޮށް ކޯޓަށް ހާޒިރުކުރުމުން އޭނާ 30 ދުވަހު ބަންދުކޮށްފައި ބެހެއްޓުމަށް ދިން މުއްދަތު ހަމަވުމުން، އަނެއްކާވެސް ކޯޓަށް ގެންދިޔުމުން އިތުރު 10 ދުވަހަށް އޭނާ ބަންދުކޮށްފައި ބެހެއްޓުމަށްވަނީ އަމުރުކޮށްފަ އެވެ.
އަލީ އަހްމަދުގެ ބަންދު އަމުރު ރިޕޯޓުން އެނގޭ ގޮތުގައި އޭނާ ސްކޫލަކަށް ވަދެ، އަޑު ގަދަކޮށް ޓީޗަރުންނަށް ބިރު ދެއްކި ކަމަށް އެ ސްކޫލުގެ މުވައްޒަފުން ބުނެފައިވެ އެވެ. އެހެންނަމަވެސް އެއީ ކޮން ސްކޫލެއް ކަމެއް އެނގިފައެއް ނުވެ އެވެ. މި މައްސަލައިގައި ކޯޓުގައި އަލީ އަހްމަދު ވަނީ އޭނާ ކުރިކަމެއް ކަމަށް އިއުތިރާފުވެސް ވެފަ އެވެ. މި މައްސަލައިގައި ދައުވާ ކުރުމާމެދު މަޝްވަރާ ކުރަމުންދާ ކަމަށް ބަންދު އަމުރުގައިވެ އެވެ.
ސްކޫލަކަށްވަދެ ބިރު ދެއްކި މީހާ
އޭނާ ބަންދުގައި ހުންނަތާ މަހެއްވެ، ދެވަނަ ފަހަރަށް ބަންދު މުއްދަތު އިތުރުކުރި އިރުވެސް މި މައްސަލައިގައި ފުލުހުންވެސް އަދި އެޑިޔުކޭޝަނުންވެސް އަދި ވާހަކަ ދައްކާފައެއް ނުވެ އެވެ. އަލީ އަހްމަދަކީ މީގެ ކުރިންވެސް ކުށުގެ ރެކޯޑްތައް އޮންނަ މީހެކެވެ. ބަންދު އަމުރު ރިޕޯޓުގައިވެސް އެކަން ފާހަގަކޮށްފައިވެ އެވެ.
ރިޕޯޓްތަކުން އެނގޭ ގޮތުގައި 2020 ވަނަ އަހަރުގެ ތެރޭގައި ރާއްޖެއަށް 72 ކިލޯގެ މަސްތުވާތަކެތި އެތެރެކުރި މައްސަލައިގައި ދައުލަތުން ދައުވާ އުފުލި މީހުންގެ ތެރޭގައިވެސް އޭނާ ހިމެނެ އެވެ. އެ ފަހަރު އޭނާގެ މައްޗަށް އުފުލާފައިވަނީ ޑައިމޯފިން ޓްރެފިކްކުރުމުގެ ކުށުގެ ދައުވާ އެވެ.
