މިކަން ހާމަކުރައްވާ ފުލުހުން އެކްސްގައި ކުރެއްވި ޕޯސްޓެއްގައި ބުނީ ބަރަހަނާ ފޮޓޯއާއި ވީޑީއޯ ހިއްސާކުރަމުންގެންދިޔަ 571 ޓެލެގްރާމް ޗެނަލް ފުލުހުން ސީޒްކޮށް 3 މީހުން ހައްޔަރުކޮށްފާއިވާ ކަމަސާއި އަދި ސީޒް ކުރެވުނު 571 ޓެލެގްރާމް ޗެނަލްތަކުގައި 241651 ފޮޓޯއާއި 86618 ވީޑިއޯ ޕޯސްޓްކޮށްފައިވާކަމަށެވެ. އަދި 3468 މީހުން މި ޗެނަލްތަކަށް ސަބްސްކްރައިބްކޮށްފައިވާކަމަށް ވެސް ފުލުހުން ވަނީ މައުލޫމާތު ދީފަ އެވެ.
ފުލުހުން ބުނީ މި މީހުން ހައްޔަރުކުރީ ޓެލެގްރާމުގައި ގިނަ އަދަދެއްގެ ޗެނަލް އުފައްދައި ރާއްޖެއާއި ރާއްޖެއިން ބޭރުގެ އެކި މީހުންގެ ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ، އެ ޗެނަލްތައް މެދުވެރިކޮށް ޕޯސްޓުކޮށް ވިޔަފާރީގެ އުސޫލުން މާލީ މަންފާ ހޯދަމުންގެންދާ މައްސަލައާ ގުޅިގެން ފުލުހުންގެ ސައިބާ ކްރައިމް ސެންޓަރުން ހިންގި ހާއްސަ އޮޕަރޭޝަނަކުން ކަމަށެވެ.
މި މައްސަލައާ ގުޅިގެން ހައްޔަރުކޮށްފައިވަނީ:
- އުމުރުން 45 އަހަރުގެ، އދ. މަހިބަދޫ، ބަހާރުގެ، ޒުބައިރު އަލީ،
- އުމުރުން 46 އަހަރުގެ، ކ. މާލެ، ދަފްތަރު ނަންބަރު ރސ14751 ނާސިފް އަލީ
- އުމުރުން 29 އަހަރުގެ، ކ. ކާށިދޫ، ސިލިންކޯ، އިސްމާއީލް ރަބީހު
ކުޑަކުދިންގެ އޮރިޔާން ފޮޓޯ އާއި ވީޑިއޯ ޕޯސްޓުކުރުމަށް 43 ޗެނަލް ހިންގާފައިވާކަން ވެސް ފުލުހުންގެ ތަހުގީގަށް އެނގިފައިވާ ކަމަށް ބުންޏެވެ.
ފުލުހުން ބުނީ އެ މީހުންގެ ބަންދާ މެދުގައި ގޮތެއް ނިންމުމަށް އެކި ދުވަސް މަތިން، އެކި ފަހަރު ކޯޓަށް ހާޒިރުކުރުމުން ބަންދުގައި ބޭތިއްބުމަށް އަމުރުކޮށްފައިވާ ކަމަށެވެ.
