ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ މިނިސްޓްރަރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ބުނީ އިއްޔެ އަލިފާނުގެ ހާދިސާ ހިންގި އިމާރާތް ތަޅާލުމުގެ މަސައްކަތް ފަށައިފިކަމަށެވެ. އެތަން ތަޅާލަން ނިންމީ އެ އިމާރާތުގެ ސަބަބުން ނުރައްކަލެއް ކުރިމަތި ވެދާނެކަމަށްޓަކައިކަމަށްވެސް އާދަމް ޝަރީފު ވިދާޅުވިއެވެ.
އެ އިމާރާތް ތަޅާލުމުގެ މަސައްކަތް ހަތަރު ވަރަކަށް ދުވަހުގެ ތެރޭގައި ނިންމާލެވޭނެކަމަށްވެސް މިނިސްޓަރު ވިދާޅުވިއެވެ.
އިއްޔެ ހަވީރު އަލިފާން ރޯވެ އަނދާ ހުލިވެފައިވަނީ ހެންވޭރުގައި ހުންނަ ގާމަގު ކެފޭ ހުންނަ އިމާރާތުގައެވެ. މި އިމާރާތުގައި އަލިފާން ރޯވީ ދެވަނަ ފަންގިފިލާގައެވެ. އެތަނަނީ ބިދޭސީންނަށް ކާންދޭ މި ކޭފެ ގެ ބަދިގެ ހުންނަ ބައެވެ.
އެންޑީއެމްއޭއިން ބުނީ އަލިފާނުގެ ހާދިސާއާ ގުޅިގެން 57 މީހަކު މަގުމަތިވެފައިވާކަށެވެ. އޭގެތެރޭގައި ހިމެނެނީ 37 ދިވެހިންނާއި 20 ބިދޭސީންކަމަށް އެންޑީއެމްއޭއިން ބުނެއެވެ. އަދި މި ހުރިހާ އެންމެނަށް ބޭނުންވާ އިންސާނީ އެހީތެރިކަން ފޯރުކޮށްދީފައިވާކަމަށްވެސް އެންޑީއެމްއޭއިން ބުނެއެވެ.
އަލިފާނުގެ ހާދިސާ ހިނގި އިމާރާތުގެ ތިންވަނަ ބައިގައި 50 ވުރެ ގިނަ ބިދޭސީން ދިރިއުޅެއެވެ. މި ތަން ހަދާފައި ހުރީ ޑެކް އަޅައިގެން ތިން ބުރިއަށެވެ. ވަށައިގެން ޖަހާފައި ހުރީ ޓިނެވެ.
މި އިމާރާތުގައި ރޯވި އަލިފާންގަނޑު ކޮންޓްރޯލްކޮށް އެއްކޮށް ނިއްވާލެވުނީ ގާތްގަޑަކަށް ގަޑިއިރެއްހާއިރު ފަހުންނެވެ. ރޯވި އަލިފާންގަނޑު ފެތުރި ޖެހިގެން ހުރި ގެއެއްވަށް ވަނީ ގެއްލުން ލިބިފައެވެ.
