ޕާކިސްތާން އަށް ނިސްބަތްވާ ކަނޑުގެ ސަރަހައްދުން ޕެޓްރޯލިއަމް އާއި ގުދުރަތީ ގޭހުގެ ބޮޑު ރިޒާވްއެއް ފެނިފައިވާއިރު، އެ ބިޔަ ރިސާވްގެ ބޭނުން ހިފުމުން އެގައުމުގެ ތަގްދީރު ބޮޑުތަނުން ބަދަލުވެގެންދާނެކަމަށް ކަމާބެހޭ ސީނިއާ ސެކިއުރިޓި އޮފިޝަލެއް ޕާކިސްތާނުގެ މީޑިއާއެއް ކަމަށްވާ ޑޯން ނިއުސް ޓީވީ އަށް ހާމަކުރި އެވެ.
އެ ސަރަހައްދުގައި ތެލާއި ގޭހުގެ ރިޒާވް ހުރިތޯ ބެލުމަށް އެކުވެރި ގައުމަކާ ގުޅިގެން 3 އަހަރުގެ ސާވޭއެއް ކުރިއަށް ގެންދިޔަކަމަށް އޮފިޝަލު، ޕާކިސްތާން ގެ މީޑިއާއަށް މައުލޫމާތުދިނެވެ.
ޖިއޮގްރަފިކް ސާވޭގެ ސަބަބުން ޕާކިސްތާނަށް ތެޔޮ ޑިޕޮސިޓްތައް ހުރި ތަންތަން ދެނެގަނެވޭއިރު، ކަމާބެހޭ ޑިޕާޓްމަންޓްތަކުން ވަނީ ޕާކިސްތާނުގެ ކަނޑުގެ ސަރަހައްދުގައި ހުރި ވަސީލަތްތަކާބެހޭގޮތުން ސަރުކާރަށް އަންގާފައިކަމަށް ޑޯން ނޫހުން ރިޕޯޓްކުރެ އެވެ.
ވަޅު ކޮނެގެން، ހަގީގަތުގައި ތެޔޮ ނެރުމުގެ މަސައްކަތަށް އެތައް އަހަރެއް ނަގާފާނެ ކަމަށް ފާހަގަކޮށް ކަމާބެހޭ އޮފިޝަލު ވިދާޅުވީ އެ ރިޒާވްތަކުން ތެލާއި ގޭހުގެ އިތުރުނަ ގިނަ ގުދުރަތީ އުފެއްދުންތަކެއްވެސް ލިބިގެންދާނެކަމަށް ބެލެވޭ ކަމަށެވެ. އަދި އޮފިޝަލް ވިދާޅުވީ އިސްނަގައިގެން އަވަހަށް މަސައްކަތް ކުރުމަކީ ޕާކިސްތާންގެ އިގްތިސާދީ ނަސީބު އަނބުރާލުމަށް އެހީތެރިވެދޭނެ ކަމެއް ކަމަށެވެ.
ބައެއް އަންދާޒާތަކުން ދައްކާ ގޮތުގައި މި ހޯދުމަކީ ދުނިޔޭގައި ހުރި ހަތަރު ވަނައަށް އެންމެ ބޮޑު ތެލާއި ގޭހުގެ ރިޒާވް ކަމަށް ބެލެވެ އެވެ.
