ޓްރެވެލް އެޑްވައިޒަރީ ނެރުނު ގައުމުތަކުގެ ތެރޭގައި އެމެރިކާ އާއި އޮސްޓްރޭލިއާ އަދި ކެނެޑާ ފަދަ ގައުމުތައް ހިމެނެ އެވެ. އެ ގައުމުތަކުން ނެރެފައިވާ އެޑްވައިޒަރީތަކުގައި މައިގަނޑު ގޮތެއްފައި ފާހަގަކޮށްފައި ވަނީ އިންތިހާބުގެ ތެރޭގައި ހަމަނުޖެހުންތަކެއް ހިނގައިފާނެތީ އެފަދަ ކަންކަމަށް ސަމާވުމަށެވެ.
އަދި ބުނީ އިންތިހާބުގެ ތެރޭގަ އާއި އޭގެ ފަހުން ވެސް ހަމަނުޖެހުންތަކެއް ހިނގައިފާނެ ކަމަށާއި އެހެންވެ ލަންކާ އަށް ދަތުރު ކުރާ ނުވަތަ މިހާރު ވެސް ލަންކާގައި ތިބި މީހުން ސަމާލުވާން އެދޭ ކަމަށެވެ.
މި މަހު ސްރީ ލަންކާގައި ބާއްވާ ރިޔާސީ އިންތިހާބުގައި ވާދަކުރެއްވުމަށް 38 ބޭފުޅަކު ނަން ހުށަހަޅުއްވާފައިވާ ކަމަށް އެ ގައުމުގެ އިލެކްޓޮރަލް ކޮމިޝަނުން ވަނީ ބުނެފަ އެވެ.
މިފަހަރު ލަންކާގައި ރިޔާސީ ކެންޑިޑޭޓުންގެ އަދަދު އެހެން އެއްވެސް ފަހަރަކަށްވުރެ ގިނަ އެވެ. އެންމެ ފަހުން 2019 ވަނަ އަހަރު އޮތް އިންތިހާބުގައި ވެސް ވާދަކުރެއްވީ 35 ކެންޑިޑޭޓެކެވެ.
ވާދަކުރައްވާ ކެންޑިޑޭޓުންގެ ތެރޭގައި މިހާރުގެ ރައީސް ރަނިލް ވިކްރެމަސިންހާ ވެސް ހިމެނެ އެވެ. ޖުލައި 2022 ގައި ރަނިލް ލަންކާގެ ރައީސް ކަމަށް ހަމަޖެއްސީ ގާނޫނު ހަދާ މަޖިލީހުންނެވެ. އެއީ އޭރު ވެރިކަމުގައި ހުންނެވި ގޮޓާބެ ރާޖަޕަކްސަ، އިގްތިސާދީ މައްސަލަތަކާ ހެދި ގައުމުގައި އުފެދުނު ބޮޑު ހަމަނުޖެހުމުގައި އިސްތިއުފާ ދެއްވުމުން އޭނާގެ ދައުރުގެ ބާކީ ބައި ފުރިހަމަކުރުމަށެވެ.
ރަނިލްގެ އިތުރުން، ކުރީގެ ރައީސް އަދި ބޮޑުވަޒީރު މަހިންދަ ރާޖަޕަކްސަގެ ދަރިކަލުން ނަމާލް ވެސް ރިޔާސީ އިންތިހާބުގައި ވާދަކުރައްވަ އެވެ.
