ޔޫއެއީ އެމްބަސީއާ ދެކޮޅަށް ދައުވާކުރި އެ އެމްބަސީން ހިންގަމުން އައި އިމާރާތުގެ ވެރި ފަރާތުންނެވެ. އޭނާ ވަނީ ކުލީގެ ގޮތުގައި 1.4 މިލިއަން ހޯދަން އެދިފައެވެ.
މި މައްސަލާގައި ދައަުވާކުރި ފަރާތުން ބުނެފައިވަނީ ޔޫއޭއީ އެމްބަސީ ގ. ނިއުޝާގެ ތިން ފަންގިފިލާއެއްގައި މެއި, 2020 އިން ފެށިގެން އޮކްޓޯބަރު, 2022 ގެ ނިޔަލަށް ހިންގާފައިވާކަމަށެވެ. އަދި ޔޫއޭއީ އެމްބަސީ އެ އިމާރާތުގައި ހިންގިއިރު އެތަނުގެ ކުލި ދައްކާފައި ނުވާތީ އާއި ނޯޓިހެއް ދިނުމެއް ނެތި އެއްބަސްވުން އުވާލާފައިވާކަމަށެވެ. އަދި އޭތު ކުއްޔަށް އެރި 92,000 އަށް ވުރެ ގިނަ ޑޮލަރު (1.4 މިލިއަން ރުފިޔާ) ހޯދުމަށް އެ ދައުވާގައި ވަނީ އެދިފައެވެ.
މި މައްސަލަ ނިންމާ ސިވިލްކޯޓުން ކުރި ހުކުމްގައި ބުނެފައިވަނީ އެމްބަސީއަށް ޑިޕްލޮމެޓިކް އިމްތިޔާޒް ލިބިގެންވާތީ އެ މައްސަލަ ނުބެލޭނެކަމަށެވެ.
ސަބަބެއްކަމަށް ހުކުމްގައި ވަނީ އެމްބަސީތަކާއި ހައިކޮމިޝަންތަކަކީ ވިއެނާ ކޮންވެންޝަން އޮފް ޑިޕްލޮމެޓިކް ރިލޭޝަން މުއާހަދާގެ ދަށުން އިމްތިޔާޒު ލިބިގެންވާ ތަންތަން ވުމެވެ. އަދި ދިވެހި ސަރުކާރުގެ ފަރާތުން ޑިޕްލޮމެޓިކް އިމްތިޔާޒު ދީފައިވާ ފަރާތްތަކުގެ މައްޗަށް ރާއްޖޭގެ ކޯޓެއްގައި ދައުވާ ނުކުރެވޭނެ ކަމަށް މަދަނީ އިޖްރައާތުގެ ގާނޫނުގައި ބުނެފައިވާކަމަށްވެސް ސިވިލްކޯޓުގެ ހުކުމުގައިވެއެވެ.
މި މައްސަލާގައި ދައުވާ ލިބޭ ޔޫއޭއީ އެމްބަސީއަށް ދައުވާ ފޯމާއި ލިޔެކިޔުންތައް ފޮނުވަން މަސައްކަތް ކުރި ނަމަވެސް، އެ އެމްބަސީއަށް އެތަކެތި ރައްދު ނުވާ ކަމަށްވެސް ސިވިލްކޯޓުން ބުނެއެވެ.
