ކައުންސިލްގެ ބެލެނިވެރި ފަރާތް މިނިސްޓްރީ އޮފް ޔޫތު އެމްޕަވާމަންޓް، އިންފޮމޭޝަން އެންޑް އާޓްސް އިން ބުނީ މިދައުރުގެ 10 މެމްބަރެއްގެ ދައުރު އަންނަ ޑިސެމްބަރު މަހުގެ 14 ވަނަ ދުވަހަށް ހަމަވާކަމަށެވެ. އެއީ މީޑިއާ ތަކުން ތަމްސީލުކުރާ ހަތް މެމްބަރުންނާއިި އާންމުގެ ފަރާތުން ކައުންސިލްގައި ތިން މެންބަރުންނެވެ.
މި މަގާމުތަކަށް ކުރިމަތިލާން ބޭނުންވާ ފަރާތްތަކަށް އެކަމަށް އެދި ހުށައެޅުމުގެ ފުރުސަތު މިމަހުގެ 25 ވަނަދުވަހުގެ 14:00ގެ ނިޔަލަށް ހުޅުވާލާފައިވާކަމަށް އިންފޮމޭޝަން މިނިސްޓްރީން ބުނެއެވެ. މެމްބަރުކަމަށް ކުރިމަތިލާން އެދެވޭނީ "މީޑިއާ ކައުންސިލްގެ އިންތިޚާބުގައި މެންބަރުކަމަށް ކުރިމަތިލުމަށް އެދޭ ފޯމު" ފުރިހަމަކޮށް ހުށެއެޅުމުންކަަމަށްވެސް މިނިސްޓްރީން ބުނެއެވެ.
މޯލްޑިވްސް މީޑިއާ ކައުންސިލްގެ މި ދައުރުގެ ބައްދަލުވުމެއްގެ ތެރެއިން
މޯލްޑިވްސް މީޑިއާ ކައުންސިލްގެ މެމްބަރުންގެ މުއްދަތަކީ މީލާދީ ގޮތުން ދެ އަހަރުއެވެ. ކައުންސިލްގެ އެއްވެސް މެމްބަރަކަށް ޖެހިޖެހިގެން ދެ ދައުރު އަދާ ނުކުރެވޭނެއެވެ.
މީޑިއާ ތަމްސީލުކުރާ ހަތް ގޮނޑިއަށް ކެންޑިޑޭޓުން ހުށައެޅޭނީ ރަޖިސްޓްރީ ކޮށްފައިވާ މީޑިއާތަކަށެވެ. އާންމު މެންބަރުންގެ ގޮތުގައި ބަލާނީ މީޑިއާ އާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަކެވެ.
