މީރާގެ ތަފާސްހިސާބުތަކުން ދައްކާގޮތުން، މިދިޔަ އަހަރުގެ މި މުއްދަތުގައި ދައުލަތަށް އެއާޕޯޓް ޓެކުހާއި ފީން ލިބިފައިވަނީ 1.3 ބިލިއަން ރުފިޔާއެވެ. މިއަހަރު މި އަދަދު 1.5 ބިލިއަނަށް އަރާފައިވުމުން، އެއާޕޯޓް ޓެކުހުގެ އާމްދަނީ ވަނީ ފާހަގަކޮށްލެވޭ މިންވަރަކަށް އިތުރުވެފައެވެ.
2022 ވަނަ އަހަރުގެ އޭޕްރިލް މަހު ގާނޫނަށް ގެނެވުނު އިސްލާހާ ގުޅިގެން، އެއާޕޯޓް ސާވިސް ޗާޖް އުވާލުމަށްފަހު ޑިޕާޗާ ޓެކްސް ނަގަން ފަށައި، އެއާޕޯޓް ޑިވެލޮޕްމަންޓް ފީގެ ރޭޓަށް ބަދަލު ގެނެވިފައިވެއެވެ. މި ބަދަލުތަކާއެކު، ޑިޕްލޮމެޓިކް އިމިއުނިޓީ ލިބިފައިވާ ފަރާތްތައް މި ޓެކުހާއި ފީން އިސްތިސްނާވާނެކަމަށްވެސް ގާނޫނުގައި ބަޔާންކޮށްފައިވެއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ފަތުރުވެރިކަމުގެ ސިނާއަތް ދުނިޔޭގެ އެކި ކަންކޮޅުތަކުގައި އިޝްތިހާރު ކުރުމުގެ ނަތީޖާއެއްގެ ގޮތުން، ރާއްޖެއަށް އަންނަ ފަތުރުވެރިންގެ އަދަދު އަހަރެއް އަހަރަކަށް އިތުރުވަމުންދާކަން ފާހަގަކުރެވެއެވެ. މިކަމުގެ ސަބަބުން ދައުލަތަށް ޓެކުހާއި ފީގެ ގޮތުގައި ވަންނަ އަދަދާއި، އިގްތިސާދަށް އެތެރެވާ ޑޮލަރުގެ މިންވަރު އިތުރުވަމުންދާކަން މި ތަފާސްހިސާބުތަކުން ދައްކައެވެ.
