މާލޭގެ މަގުތަކަށްް ދޫކޮށްލާފައި ހުރި ވެހިކަލްތައް މާލޭ ސިޓީ ކައުންސިލުން ނަގަން ފަށައިފިއެވެ. ފުލުހުންނާއި ގުޅިގެން މި މަސައްކަތް ސިޓީ ކައުސިލުން ފެށީ މިއަދު ހެނދުނުއެވެ.
ސިޓީ ކައުންސިލުން ބުނީ މިކަމަކީ މާލޭގެ ސިޓީގެ މަގުތަކަކީ ސާފުތާހިރު ހިތްފަސޭހަތަނަކަށް ހެދުމަށްޓަކައި ކުރެވޭ މަސައްކަތެއްކަމަށެވެ.
މާލޭ މަގުމަތީ ގިނަދުވަސްވެ، ބާވެ ހަލާކުވެފައި ހުރި 224 ސައިކަލް މިއަދި ނަގާފައިވާކަމަށް ސިޓީ ކައުންސިލުން ބުނެއެވެ.
މާލޭ މަގުތަކުގައި ނުނަގާ ހުންނަތާ އެތައް އަހަރެއް ވީ ވެހިކަލްތައް އެބަހުރިކަމަށް ކައުންސިލުން ބުނެއެވެ. އޭގެތެރޭގައި ބައެއް ސްޕޭއާތައް ނެތް ވެހިކަލްތައް ހުރިކަން ކައުންސިލުން ފާހަގަކުރެއެވެ.
މާލެއާއި ހުޅުމާލޭގައި ހުރި މި ފަދަ ބާ ވެހިކަލްތައް ނަގާ ނައްތާލުމުގެ މަސައްކަތް ޓްރާންސްޕޯޓް މިނިސްޓްރީންވެސް ކަމާއި ގުޅޭ ދާއިރާތަކާއި ގުޅިގެން އަންނަނީ ކުރަމުންނެވެ. މިދިޔަ ފެބްރުއަރީ މަހު ފެށި ޕްރޮގްރާމުގެ ތެރެއިން 300 އެއްހާ ވެހިކަލް މަގުތަކުން ނަގާ ވަނީ ނައްތާލައިފައެވެ.
