މި ނިންމުމަކީ މަތީ ތައުލީމު ދޭ މަރުކަޒުތަކުން ހިންގާ ކޯސްތަކުގައި ހަދަން ޖެހޭ އެސައިންމަންޓްތައް އެހެން މީހުން ލައްވައި ހެދުމާއި ގަނެ ވިއްކުމުގެ މައްސަލަ ހައްލުކުރުމަށް އަޅާ ފިޔަވަޅެކެވެ.
އެމްކިޔުއޭގެ ސީއީއޯ ފިޒާނާ ރަޝީދު ދައުލަތުގެ މީޑިއާ މެދުވެރިކުރައްވައި ވާހަކަ ދައްކަވަމުން ވިދާޅުވެފައިވަނީ، ކޯސްތަކުގައި ދަރިވަރުންނަށް ހަވާލުކުރާ އެސައިންމަންޓުތައް އެހެން މީހުން ލައްވައި ހަދާ މައްސަލަތައް އެ އޮތޯރިޓީ އަށް ލިބެމުންދެއެވެ. މި މައްސަލަ ހައްލުކުރުމަށްޓަކައި، ކޯސްތަކުގައި ހަދާ އިމްތިހާނުތަކުން 50 ޕަސެންޓު ފާސްވެގެން ނޫނީ އެ ކޯހުން ފާސް ނުވެވޭ ގޮތް ހެދުމަށް ނިންމާފައިވާ ކަމަށް އޭނާ ވިދާޅުވިއެވެ.
މި ބަދަލު ގެންނަން ނިންމީ މަތީ ތައުލީމު ދޭ މަރުކަޒުތަކުގެ އިސްވެރިންނާ ބައްދަލުކޮށް، މަޝްވަރާ ކުރުމަށްފަހުގައެވެ. އަދި މި ނިންމުން ވަރަށް އަވަހަށް އާންމު ކުރާނެ ކަމަށްވެސް ފިޒާނާ ވިދާޅުވިއެވެ.
ދެހާސްއެކާވިހު ގައި އަމަލުކުރަން ފެށި މަތީ ތައުލީމުގެ ގާނޫނުގައި، އެސައިންމަންޓް އެހެން މީހުން ލައްވައި ހެދުމާއި ގަނެވިއްކުމުގެ މައްސަލައަށް އަދަބު ކަނޑައަޅާފައިވެއެވެ. މި ގާނޫނުގެ ދަށުން، އެފަދަ އަމަލެއް ކުރާ ދަރިވަރުން 5،000 ރުފިޔާއިން ޖޫރިމަނާކުރެވޭނެއެވެ. އަދި އަގަށް އެފަދަ މަސައްކަތްތައް ކޮށްދޭ މީހުން 10،000 ރުފިޔާއިން ޖޫރިމަނާ ކުރެވޭނެއެވެ.
މިހާތަނަށް މި ގާނޫނުގެ ދަށުން އެއްވެސް ފަރާތަކަށް ފިޔަވަޅު އެޅިފައިވާކަން އެނގޭކަށް ނެތެވެ. އެމްކިއުއޭގެ މި އައު ނިންމުމަކީ، މި މައްސަލަ ހއްލުކުރުމަށް އެޅޭ އިތުރު ފިޔަވަޅެއްގެ ގޮތުގައި ބެލެވެއެވެ.
