މި ބައްދަލުކުރެއްވުން އޮތީ އދގެ އާއްމު މަޖިލީހުގައި ހަވާސާގަ އެވެ.
އެމެރިކާގެ ނިއު ޔޯކުގައި ކުރިއަށް ގެންދާ އދ.ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ޝެހްބާޒްއާ ރައީސް މުއިއްޒު ބައްދަލު ކުރެއްވިއިރު، މީ ދެ ގައުމުގެ އިސްވެރިން މިގޮތަށް ފަހުގެ ތާރީހެއްގައި ބައްދަލު ކުރެއްވި ފުރަތަމަ ފަހަރެވެ.
އެންމެ ފަހުން ރާއްޖޭގެ ރައީސަކު ޕާކިސްތާނުގެ ބޮޑު ވަޒީރާ ބައްދަލު ކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރުގެ ޕާކިސްތާނުގެ މުހައްމަދު ނަވާޒް ޝަރީފް، ރާއްޖެއަށް ކުރެއްވި ރަސްމީ ދަތުރުފުޅުގަ އެވެ.
މި ބައްދަލުކުރެއްވުމުގައި ރައީސް ވަނީ ދެ ގައުމުގެ މެދުގައި އޮތް ގާތް އަހުވަންތަ ގުޅުން ފާހަގަކުރައްވައި، އެކި ދާއިރާތަކުން ޕާކިސްތާނުން ދޭ އެހީތެރިކަމަށް ޝުކުރު އަދާކުރައްވާފަ އެވެ. އަދި ސަރުކާރުން މިހާރު ކުރިއަށްގެންދަވާ ތަރައްގީގެ މަސައްކަތުގައި އެހީތެރިކަން ބޭނުންވާ ދާއިރާތަައްވެސް ރައީސްގެ ވާހަކަފުޅުގައި ފާހަގަކުރެއްވި އެވެ.
ޕާކިސްތާނުގެ ބޮޑުވަޒީރު ދެއްކެވި ވާހަކަފުޅުގައި ވަނީ އެކި ދާއިރާތަކުން ރާއްޖެއަށް ބޭނުންވާ އެހީތެރިކަން ފޯރުކޮށްދިނުމުގައި ދެމިއޮންނާނެކަމުގެ ޔަގީންކަން ދިވެހި ސަރުކާރަށް ދެއްވި އެވެ.
ރައީސް އާއި ޕާކިސްތާނުގެ ބޮޑުވަޒީރުގެ ބައްދަލުކުރެއްވުން ނިންމަވާލެއްވީ ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން ކުރަމުންދާ މަސައްކަތް ދެމެހެއްޓުމުގެ އިތުރުން، ދެ ގައުމުގެ މެދުގައި އޮތް ސިޔާސީ ގުޅުން އިތުރަށް ވަރުގަދަކުރުމަށް މަސައްކަތް ކުރައްވާނެކަމުގެ ޔަގީންކަންވެސް ދެއްވަމުންނެވެ.
