މިއަދު ސޮއިކުރެވުނު އެ އެމްއޯޔޫގެ ދަށުން ގާއިމްކުރާ 'އާޓްސް އެންޑް ކަލްޗާ ސެންޓާ' އެކަށީގެންވާ ގޮތެއްގައި ބޭނުންކުރުމާއި، ހިންގުމާއި ބެލެހެއްޓުމާ ގުޅޭ ހުރިހާ ކަމެއްގައި ބީސީއާއި މޯލްޑިވްސް ޕޮލިޓެކްނިކް ގުޅިވަޑައިގެން މަސައްކަތް ކުރާނެކަމުގެ ޔަގީންކަން ބީސީސީން ދެއެވެ.
މިއަދު ހެނދުނު ސީޑްބައި ބީސީސީ ގައި ބޭއްވި މި ފަހުމުނާމާގައި ސޮއިކުރުމުގެ ރަސްމިއްޔާތުގައި ބީސީސީގެ ފަރާތުން ސޮއިކުރެއްވީ ޗީފް ސްޓްރެޓެޖިގް އޮފިސަރު މަރިޔަމް ނަޝާއެވެ. އަދި މޯލްޑިވްސް ޕޮލިޓެކްނިކްގެ ފަރާތުން ސޮއި ކުރެއްވީ ޗީފް އެގްޒެކެޓިވް އޮފިސާ ޒޫޝާން ކަމާލުއްދީން އެވެ.
އާޓްސް އެންޑް ކަލްޗާ ސެންޓަރުގެ ވަސީލަތްތައް ބޭނުންވާ ފަރާތްތަކަށް ދޫކުރުމާ ގުޅޭ އިންތިޒާމުތައް ހަމަޖައްސައި ހިންގުންވެސް އޭގެ ތެރޭގައި ހިމެނެއެވެ. އެގޮތުން އިލްމީ ވަސީލަތްތަކާއި، ފަންނީ ލަފަޔާއި، ތަން ހިންގުމަށް ބޭނުންވާ ލޮޖިސްޓިކަލް ގޮތުން އެއްބާރުލުން ދިނުމުގެ އިތުރުންވެސް ތަނުގެ ހިދުމަތާއި ވަސީލަތްތައް ބޭނުންކުރާ ފަރާތްތަކަށް އިލްމީ ގާބިލުކަން އިތުރު ކުރެވޭނެފަދަ ގޮތަކަށް ކަންކަން އިންތިޒާމުކޮށް ހިންގުން ހިމެނޭކަމަށް ބީސީސީން މައުލޫމާތުދެއެވެ.
ބީސީސީއާއި ޕޮލިޓެކްނިކް ގުޅިގެން އާޓްސް އެންޑް ކަލްޗާ ސެންޓާ އިޝްތިހާރުކޮށް، ރާއްޖޭގެ ވިޔަފާރިވެރިންނަށާއި، އިޖުތިމާއީ ގޮތުން ހަރަކާތްތެރިވާ ޖަމާއަތްތަކަށާއި، އެނޫންވެސް ކަމާބެހޭ އެންމެހާ ފަރާތްތަކަށް އެތަނާބެހޭ މައުލޫމާތު ފޯރުކޮށްދީ ހެދުމަށް ތަފާތު ހަރަކާތްތައް ހިންގުމަށްވެސް އެ ފަހުމުނާމާގެ ސަބަބުން މަގުފަހިވެގެންދާޏެކަމަށް ބީސީސީން ބުނެއެވެ.
