މަޑިވަރު އެއާޕޯޓަކީ މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ކުރެއްދޫ ހޯލްޑިންގްސް ތަރައްއްީކޮށްފައިވާ ތަނެކެވެ. މަޑިވަރު އެއާޕޯޓް ހިންގުމަށް ގައުމީ އެއާލައިން ހިންގާ އައިލެންޑް އޭވިއޭޝަން ސާވިސަސް ލިމިޓެޑާ ހަވާލުކޮށްފައިވަނީ 2022 ވަނަ އަހަރުގެ ޖެނުއަރީ މަހުގެއެވެ.
އައިލެންޑް އެވިއޭޝަނުން މަޑިވަރު އެއާޕޯޓް ދޫކޮށްލަނީ އެ އެއާޕޯޓް ހިންގުމަށް ހަދާފައިވާ އެއްބަސްވުމުގެ މުއްދަތު ހަމަވުމުންކަމަށް ވަނީ އެނގިފައެވެ. އަދި އެއްބަސްވުން އާ ކުރަން ދެފަރާތުން ވާހަކަ ދެއްކިނަމަވެސް އެކަމުގައި އެއްބަސްވުމަކަށް ނާދެވުމުން އައިލެންޑް އޭވިއޭޝަނުން ވަނީ އެއާޕޯޓްް ދޫކޮށްްލަން ނިންމާފައެވެ. މިހާރު ކުރިޔަށް ދަނީ ހޭންޑް އޯވާކުރުމުގެ މަސައްކަތްކަންވެސް ވަނީ އެނގިފައެވެ.
މަޑިވަރު އެއާޕޯޓްގެ އޮޕަރޭޝަންތަކުގެ ބޭނުމަކަށްް އެތަނުގައި 22 ކަށްް މުވައްޒަފަކު މަސައްކަތް ކުރަމުން އާދެއެވެ. މުއްދަތު ހަމަވެ އެތަން އައިލެންޑް އޭވިއޭޝަނުން ދޫކޮށްލާއިރު ދޫކޮށްލާނީ މުވައްޒަފުންނާއި އެކުކަމަށް އެކަން އެނގޭ ފަރާތަކުން ބުންޏެވެ. އެހެންކަމުން މުވައްޒަފުން ދަނީ އެއާޕޯޓް ވެރި ކުންފުނީގެ ދަށަށްކަމަށްވެސް ވަނީ އެނގިފައެވެ.
އަންނަ މަހުގެ 16 ވަނަދުވަހުން ފެށިގެން އައިލޭންޑް އޭވިއޭޝަނުން މަޑިވަރު އެއާޕޯޓް ދޫކޮށްލާނެކަން އެތަނުގެ މުވައްޒަފުންނަށްް ވަނީ އަންގާފައެވެ.
މަޑިވަރު އެއަރޕޯޓުގައި 1200 މީޓަރުގެ ރަންވޭއަކާއެކު އެއް ފަހަރާ ހަތަރު މަތިންދާ ބޯޓަށް ހިދުމަތް ދެވެން ހުންނަ އިރު، ޓާމިނަލުގައި އާންމު ފަސެންޖަރުންގެ އިތުރުން 80 މީހުންގެ ޖާގައިގެ ވީއައިޕީ ލައުންޖެއް ވެސް ހިމެނެއެވެ.
