މި ހުކުމް އިއްވާފައިވަނީ ށ. ހުޅުދޫ، ބުލްބުލާގެ، އަހްމަދު ފިރާގުގެ މައްޗަށެވެ.
ގ. ޝަބްނަމްލޮޖް މުނައްވަރު ހާދީގެ އަމާޒް ދޯންޏާއި އަމާޒް ކްރައުން ދޯނި ކުއްޔަށް ހިފުމަށްފަހު، އޭގެ ކުއްޔަށްވާ ފައިސާ ދެއްކުމަށް ފިރާގު ދިން ޗެކް ބައުންސްވެފައިވާކަން ފާހަގަކުރެވެއެވެ. ޗެކުގައިވާ އެކައުންޓުގައި ފައިސާ ނެތުމުގެ ސަބަބުން މުނައްވަރު ހާދީއަށް އެ ފައިސާ ލިބިފައިނުވާކަން ކޯޓުން ކުރި ހުކުމުގައި ބަޔާންކޮށްފައިވެއެވެ.
ކޯޓުގެ ހުކުމުގައި އިތުރަށް ފާހަގަކޮށްފައިވާ ގޮތުގައި، ފައިސާ ހޯދުމަށް ތަކުރާރުކޮށް އެދުމުންވެސް ފިރާގުގެ ފަރާތުން އެ ފައިސާ ދައްކާފައިނުވެއެވެ. ނަމަވެސް، ފިރާގު ކޯޓުގައި ބުނެފައިވަނީ ދޯނިތަކުގެ ކުއްޔަށްވާ ފައިސާ ދައްކަމުންދާ ކަމަށާއި، އެ ފައިސާ ޓްރާންސްފަރ ކުރި ކަމުގެ ސްލިޕް އޭނާގެ އަތުގައި ހުންނާނެ ކަމަށެވެ.
އެހެންނަމަވެސް، މި ސްލިޕްތައް ޕްރޮސިކިއުޓާ ޖެނެރަލްގެ އޮފީހާ ހިއްސާކުރުމަށް ކޯޓުން އެދުމުން، ފިރާގު އެކަން ކޮށްފައިނުވާކަން ހުކުމުގައި ފާހަގަކޮށްފައިވެއެވެ. މި މައްސަލައިގައި މަކަރާއި ހީލަތް ހެދުމުގެ ދައުވާ ޝައްކެއްނެތް މިންވަރަށް ފިރާގުގެ މައްޗަށް ސާބިތުވާކަމަށް ކޯޓުން ކަނޑައަޅައި، އޭނާގެ މައްޗަށް އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް އިއްވާފައިވެއެވެ.
